Pynmih thymmai ka sorkar bun tylli ki jaka ban pynïeng kali harud surok

Shillong:Ka Sorkar Jylla ka la ithuh ia bun ki jaka ha sor Shillong ban pynieng kali harud surok bad ruh ki jaka ki bym shah pynïeng kali nalor ka jingpynbna ïa ka dor ban lum ïa ka bai pynïeng kali, ka ban treikam naduh ka 1 tarik Nailar.

Kane ka sienjam ka dei shibynta na ka jingpyrshang jong ka Sorkar ban weng ïa ka jingkhapngiah ka sor bad ban pyrkhing ïa ka jingpynïeng kali kulmar kat shaba lap ba shem.
Kane ka jingpynbna kan treikam ha kylleng ki thaiñ kiba hab hapoh ki Traffic Branch bapher bapher ba kynthup ïa ka Sadar, Madanrting, Laban, Mawlai, Rynjah, Lumdiengjri bad Laitumkhrah.

Kane ka la mih hadien ba ka Tnad Urban Affairs ka la pynmih ïa ka Meghalaya Parking Policy for Urban Areas, 2025. Kane ka policy ka la batai bniah ïa ki jingteh kyndon bad rukom pynïaid ïa ki jaka pynïeng kali ha ki jaka sor na ka bynta ka jingweng ïa ka jingkhapngiah ka sor Shillong.
Ka jingpynbna ba la pynmih da u Commissioner & Secretary ka tnad Urban Affairs Dr Vijay Kumar ha ka 26 tarik Jylliew, ka ong ba ka dor bai pynïeng kali ha ka shikynta kan long T.20 ïa ki kali arshaka bad T.40 ïa ki saw shaka ha ki surok ba don ki jaka ïew (commercial area) bad T.15 ïa ki ar shaka bad T.30 ïa ki saw shaka ha ki jaka ki bym don jaka ïew (non-commercial area).

Ka Tnad ka la thaw ruh ïa hynñiew tylli ki Zonal Task Force ba la khlieh da ki Additional District Magistrate na ka bynta ban khmih bad peit ïa ka rukom pynïeng kali.
Ha ryngkat ka jingïasyllok bad ka Tnad Public Works Department (PWD) bad ki Dorbar Shnong, ki Zonal Task Force kila dep ithuh ïa ki jaka kiba ïahab ban pynïeng kali harud surok.
Ka jingpynbna ka ong ba ka por naduh ka sngi ba pynmih ïa ka jingpynbna tad haduh ka 1 tarik Nailar, yn pyndonkam da ka Tnad bad ki Zonal Task Force ba kin nang pynbeit ryntih ïa ki kyndon ban lum bai pynïeng kali bad ban ïasam ïa ka jingmih.

“Kino kino ki jinglum khlem da ïoh bor lane ïaid lait na ka dor ba la buh, kan khring ïa ki jingpynshitom kat kum ki kyndon aiñ,” ka la maham.
Ka Tnad kan sa shongbishar thymmai ïa kai bai pynïeng kali na ka por sha ka por.
Kane ka jingpynbna kan treikam tad haduh da pynmih da kawei pat ka hukum.