Shillong:U Dharmendra Pradhan, myntri ka pule puthi, ula bthah ia ka Tnad ba dei khmih jong ka Ministry ba kan leh ia kaba donkam halor ka jingdonkam ban thung noh ia u Vice Chancellor (VC) ba thymmai jong ka North Eastern Hill University (NEHU). Lah ban kdew hangne ba ka Skulbah NEHU ha ki bnai ba la dep ka don hapdeng ka jingbym shongsuk shongshngain na ka jingmih ka huri hura ha kaba iadei bad ka jinglehmon u Vice Chancellor ka NEHU u Prof P S Shukla.
Haba kren sha ki ladpathai khubor u bah Alexander L Hek, u la iathuh ba u la thoh da ka shithi bad phah lang ruh ia ka Shithi ba la phah da ka NEHUSU, KSU NEHU Unit, halor ka jingdawa ban weng noh ia u Vice Chancellor ka NEHU bad ban thung da u Vice Chancellor ba thymmai ha Skulbah NEHU.
“Halor kane u Ministry of Education (MoE) u Dharmendra Pradhan, myntri ka pule puthi ka sorkar India, u la phah ia ka jubab mynta ka sngi, kaba la ithuh ba halor kane ka mat la phah sha ka tnad ba dei peit, na ka bynta ba kin shim ia ka sienjam ba donkam” u la ong.
“Ha kane ka shithi la kdew ia ka jingai khublei na u Myntri halor ka jingpyntip u bah Hek halor ka kynrum kynram ha kane ka skul bah bad ruh halor ka jingphah ia ka shithi na ka NEHUSU bad KSU NEHU Unit, hakaba u la pyntip ba ia kane ka mat la phah ban bishar sha ka tnad kaba dei ban khmih” u la bynrap.
U bah Hek u la ong ruh ba ka jingkynnoh ba Sorkar pdeng kam ju shimkhia ia kino kino ki jingdawa na ka Jylla ka dei kaba bakla, namar lada ki leh kumta kin nym ai satia ka jubab ia ka shithi ba la phah ha kaba ia dei bad ka NEHU.
Phi don ban ong eiei?