Mynta ka kynti, ka la mih sa ka jing ia kynad hapdeng ka Assam bad ka Arunachal Pradesh bad katei ka dei hadien ka jingiap jong uwei u nongniah trok, uba 21 snem ka rta, ha Tuting ha Arunachal Pradesh. Katei ka jingjia, ka la pynmih ia ka jingkhie bitar jong kiba bun ha Silapathar ha Dhemaji District jong ka Assam.
La iathuh ba U Dhurba Pathak, ula shah siat iap ha ka 14tarik Naiwieng 2020 ha Turing, kaba hap ha Upper Siang district jong ka Arunachal Pradesh, na ka daw jong ka jing ia mai ha ka jing ia tyngkhuh kali.
Ki nong iakhih ha ka National Highway-15 ha Silapathar, ki la khang lut ia baroh ki kali kiba leit sha Arunachal Pradesh bad katei ka la iai bteng la saw sngi kynthih, ong ka khubor.
Mynta ka jingleit ki mar bam, ka petrol bad kiwei ki mar ba kongsan, ka la sahkut lut ha u pud jong ka Assam, kaba dei ban leit sha Arunachal Pradesh.
Mynta ka sngi, ki la don kiba khang ia ka surok bah ha Sili, hynrei ki pulit, ki la bom lathi bad beh krad ia kitei kiba pynthut ia ka iaid ka ieng ki kali, hynrei la iathuh ba ki nongniah trok, kim shym la trei ban leit sha katei ka jaka, namar ka jingsngew artatien ia ka leit ka wan.
La iathuh ba ki DP bad ki SP jong ka Central Arunachal Pradesh, kin ia kynduh lashai ka sngi ban teh lakam ia katei ka jing ia kynad bad la iathuh ba ki la khot sngewbha ruh ia U Deputy Commissioner, ka Dhemaji District lem bad U Superintendent of Police sha katei ka jingialang.
Phi don ban ong eiei?