U MLA jong ka Assam, ula shah sei tuh ia ka pisa kaba T.14lak na ka Bank, kaba u buh pisa ha State Bank of India ha Guwahati.
U Utpal Dutta, uba dei U MLA jong ka seng Asom Gana Parishad (AGP), ula shah sei tuh ia katei ka pisa na ka SBI, Dispur Branch.
La lap ia katei ka jingshisha, haba ka kurim jong U MLA, uba na Lakhimpur, ka leit ban sei pisa, hynrei, ynda haba ka la poi ha Bank, la iathuh ba ka pisa kaba T.14lak, ka la jah na ka Bank jong u kurim jongka bad la iathuh ba wat ka mobile number jong u tnga jongka, la don ba pyn kylla naduh ka 19tarik Jymmang 2018, khlem ka jingtip jong utei U MLA.
U Utpal Dutta, ula ujor sha ki pulit, ha kaba ula iathuh ba ka account jongu, kaba don ia u number 10821663278 ha SBI Dispur, la sei tuh da ki riew runar, ha ka 19tarik Jymmang 2018.
“La pynkylla ia ka phone number jongnga, ha ka 19tarik Jymmang bad la pyn treikam ruh ia ka internet banking khlem ka jingtip jongnga. Haba nga la kylli na ki nongtrei ha Bank, kim shym la ai jingtip satia kaba shai” ong U MLA. Ki riew runar, ki la lute T.14lak na ka account jong utei U MLA, lyngba ka internet banking.
U MLA, u iathuh ba ki nongtrei Bank, kim shym la trei lang satia bad u bad ka pyni ba ki don bynta lang ha katei ka jingsei tuh ia katei ka pisa.
La sngewthuh ba katei ka kurim jong U MLA, ka la dei ban sei pisa T.45,000 na katei ka account, hynrei la iathuh ia ka, ba katei ka pisa kam don satia ha katei ka account bad kumta, katei ka jingjia, ka la pynkyndit ia ka kurim jong U MLA.