Vatican: U Cardinal Robert Prevost, uba na United States of America, ula shah jied kum u khlieh duh jong ka balang katholik, hynnin ka sngi, ha kaba ula jied ruh ialade, da ka kyrteng kaba thymmai, kaba u ai Leo XIV, bad u dei ruh u khliehduh ba nyngkong jong ka balang katholik, uba wan na ka ri America.
U Pope Leo, ula pynithuh ialade sha u paidlang jong katei ka balang katholik, uba ialum lang ha ka phyllaw jong ka St. Peter’s Basilica, hadien ba ka tdem kaba lieh, ka la mih na u atoskhana jong ka iingmane bah ka Sistine Chapel bad kaba dei ka dak, ba ki 133ngut ki nongjied kiba dei ki cardinal, ki la ioh ia u khliehduh ba thymmai jong ka balang katholik, u ban ialam ia ki 1.4 billion ngut ki riewngeit jong ka balang katholik.
Ia katei ka rai, la pynbna paidbah da U Cardinal Dominique Mamberti, uba dei u cardinal, uba na France, da ka kyntien latin kaba u ong “Habemus Papam” (ngi la ioh ia u pope) ha kaba u pynbna sha u paidlang uba ai khmih lynti ha ka phyllaw jong ka St. Peter’s Square.
U Prevost, uba don 69 snem ka rta, u dei na Chicago, bad ula pynlut ia bun bah ka por treikam jongu ha Peru bad ula long u cardinal, naduh u snem 2023 bad u dei u bym ju kham kren shabar ia ki kam jong ka balang katholik.
U Leo, mynta u dei u pope, uba 267 jong ka balang katholik, ha kaba u shimti hadien ka jingkhlad jong u Pope Francis, uba dei u pope, uba nyngkong duh na ka ri Latin American bad ula ialam ia ka balang katholik, la 12 snem kynthih.
Phi don ban ong eiei?