Shillong:Ka seng Congress, mynta ka sngi ka la pynbna ba kan ym don bynta ha ka All Party Committee ban iakren halor ka jingthmu pyniasoh lynti Rel hapoh ka Jylla, da kaba kdew ba ka dei ia ka jingthaw ka Sorkar ia kane ka Committee ruh ka dei na ka jingbym lah jong ka ban weng ia jingeh ba la pynsngew da ki paidbah.
Haba kren sha ki ladpathai khubor u Secretary ka Meghalaya Pradesh Committee (MPCC) u Bah Manuel Badwar, u la ong ba ka jingthaw All Party Committee da ka Sorkar Jyllaban pynbeit iaki mat kiba ktah ia ka bha ka miat ki paidbah nong shong shnong ka Jylla.
“Ka jingthaw Committee ka pyni ruh ia ka jingbym lah ka Sorkar ban weng da lade naki jingeh ba la pynsngew daki paidbah nong shnong ka Jylla, bunsien ka Sorkar Jylla kam ju sngew donkam ban iatreilang lang bad kiwei ki seng sain pyrthei naka bynta ban shim iaki rai bad kane ka jingthaw Committee kadei tang ban pynthame iaki paidbah” u la ong.
“Hadien ba ka Sorkar ka sngew ba ka la sahkut ha ki jingeh bad ka sngew ba kam lah ban weng ialade na kita ki jingeh, kumta ka sngew donkam ban iawer lut ïa baroh khnang ban shah kynnoh lang ïa baroh. Kane kam long kaba dei” u la bynrap.
“Shaei jah kata ka All Party Committee ha ka por ba ka Sorkar Jylla ka thmu wanrah ia ki Casino. Shaei jah ka All Party Committee ha ka por ba iakren pynbeit pud bad ka Jylla Assam” la buh jingkylli u Bah Manuel.
Haba pynpaw baka Congress kam treh ban don lang ha ka All Party Committee, u Secretary ka MPCC u la ong “Ia ki la jied da ki paidbah ban ialam ia ka Sorkar, ki dei ban pyndep ia la ka kamram kumba la bynshet ki paidbah”.
Phi don ban ong eiei?