Nongpoh: Haba ai jingkren ha ka jingialang ban plie paidbah ia ka Building thymmai jong ka Bhoirymbong C&RD Block, kaba la long mynhynnin ha Khapmara, u Conrad K. Sangma, Myntri Rangbah ka sorkar jylla, u la ong ba ka sorkar jylla, ka la ioh ia ka jingpynmang pisa kaba T. 500 klur, na bynta ban pynheh bad bad pynjanai lut ia baroh ki jingdonkam hapoh ka Kad Liengsuin Umroi.
Shuh shuh, u Conrad K. Sangma, u la ong ba ynda la dep katei ka jingthmu jong ka sorkar, kaba mut ba ki Liengsuin baheh ki la lah ban hiar ha Kad Liengsuin Umroi bad nalorkata kan sa pyniasoh lut sha baroh ki Kad Liengsuin kiba heh ba paw bad kiba don ha kylleng ki jylla bad ki Nongbah kiba don ha India.
“Ynda la dep katei ka jingthmu ka sorkar ban pynheh ia ka Kad Liengsuin Umroi, kan sa pynmyntoi ia ki paidbah ym tang ha Ri Bhoi, hynrei ha ka jylla hi baroh kawei, kata ka long ba ki nongjngohkai pyrthei ki la lah ban wan beit beit sha Umroi, khlem da donkam shuh ban shong da ki Liengsuin kiba hiar ha Assam, ha kata ka por, ki paidbah kin sa iohkam iohjam, naduh ki nongniah kali kamai, kiba buh ia ki dukan bapher bapher lem bad kiwei kiwei” ong u Conrad K. Sangma.
Nalor kaba u kren halor ka Kad Liengsuin ha Umroi, u Conrad K. Sangma, lyngba jong katei ka sngi, u la ong ruh ba ka jylla kan sa ioh ia kawei ka surokbah (Express Way), kaba sam lyngba ka Ri Bhoi sha kiwei pat ki jaka hapoh ka jylla, ha kaba ka jingpynmang Tyngka ia kata ka surok kan long haduh T. 5000 klur, ha kaba katei ka surok kan sa pynmyntoi eh ia ki paidbah ha Ri Bhoi bad ia ka jylla hi baroh kawei.
Namarkata, kumba kane ka sorkar ka la kular hakhmat ki paidbah ba kan treibha bad trei na bynta u paidbah, kumta kumba la kular ka la leh shisha kata naduh u snem 2018, ha kaba shibun ki kam pynroi ki la iaid shaid shaid, kata ka long naduh ki jaka pule puthi, ki jaka ai jingsumar paidbah, ki lynti ki surok lem bad kiwei kiwei, ba ki paidbah ki donkam, u la bynrap.
Phi don ban ong eiei?