Nongpoh, 05 Naitung: Ki nongialam ka FKJGP Shakoikuna Circle, ia kaba la ialam da u Bah Khil Maring, President ka FKJGP Shakoikuna Circle, ha ryngkat ka jingdon ki dkhot ka Circle, mynta ka sngi, ki la leit ban jurip ia ka surok PMGSY bad ki la lap ba ki don ki bynta jong katei ka surok, ba ka rong surok ka la pra noh tang mar ia dep siangrong dang kumba shi bnai eiei.Ka nongrim kaba la pynlong ia ki nongialam ka FKJGP Shakoikuna Circle, ba kin leit jurip ia katei ka surok, ka dei hadien ba ki la ïoh ia ka jingujor na ki riew paidbah jong katei ka thain, ha kaba ki la lap ba ki la don ki bynta ba dang shu Siangrong ia katei ka surok, ki la jot bad pra noh, kata wat haba ka jingsiangrong ia katei ka surok ym pat dep lut.
Ha katei ka sngi, ba la leit ban jurip ia katei ka surok, la lap ia ka jingshisha halor ka jingjot jingpra jong katei ka surok kaba dang shu dep Siangrong bad kaba la pynlong ia ki nongialam ka seng bad ki riew paidbah ba kin sngewkhia eh, ban ïohi ia ka jingtrei torti u Kontraktor ia katei ka surok, namar ka dei kaba dang shu Siangrong, hynrei ka pra noh wat haba ïaid tang ki kali rit.Haba bad ka jingpra kloi noh jong katei ka surok, u Bah Khil Maring, u la ong ba kum ka seng ka sngewkhia eh ban ïohi ba kumno ka surok kaba dang shu dep Siangrong, hynrei kan shu jot shu pra noh bad halor kata u la kynnoh ba ka nongrim hi kaba la pynlong ia katei ka surok ba kan jot kan pra noh, ka daw hi ka dei na ka jingbym treibha u kontraktor.
Kumta haba iadei bad ka jingjot kloi katei ka surok, ka FKJGP Shakoikuna Circle, ki la kyntu ia ka tnat PWD ba kin shimkhia halor katei ka kam bad ba kin wan jurip hi dalade khnang ba kin lap ia ka jingshisha bad ha kajuh ruh ka por ba ka tnat PWD ba ki dei ban bthah ia u Kontraktor ba u dei ban shna bha ia katei ka surok PMGSY, khnang ba kan da long shisha ka ka ban ai jingmyntoi ia ki paidbah jong katei ka thain hi baroh kawei bad kiba pyndonkam ia katei ka surok.
Phi don ban ong eiei?