Shillong:U Superintendent of Police, u bah Vivek Syiem u la ong, ba ka long kaba donkam ia ki nongwan jngohkai pyrthei bad lada ki thmu ban leit peit kai ia ki jaka kiba don ha ka Jylla Meghalaya ki dei ban leit lang bad ki nongsynran bad ban shimkhia ban pyntip ha ki jaka ba ki sah ba shaei ki thmu ban leit, ban pan ia u Emergency number khnang ba kan tem ia kano kano ka jingjia ba sniew.
Haba kren halor ka jingiap u nongjngohkai pyrthei na ka Ri Hungary u Zold Puskas u ba la jah naduh ka 29Tarik Lber 2025 bad lap ia ka met iap Jong u ha ka 10 Tarik Iaiong 2025 na ka khlaw Ryngkuskan kaba hap hapoh ka Elaka Ramdait kaba don ha Shella, u SP u la iathuh, ba ka met ka la pyut lut kumta ka la kham eh ban ithuh ka daw ba u la khlad, hynrei kawei ka long ba kam I don kano kano ka jingthombor ne ka jingshah tuh namar ki tiar ki tar jong u baroh ki don hi bad u bad namar u don ka met bym kloi ka lah ban long, namar ba u kem pang bad kam dei ba don ba thombor ia u.
U la ong ruh ba ia ka post mortem la dep halor kane bad ki Forensic ki la poi sha kane ka jaka bad ka met mynta ka dang don ha Civil Hospital bad yn dang ap ka jubab na u Secretary ka Embassy ban ioh ka jubab na kiba ha ing khnang ba kin lah ban wan shimti ia ka met lane ba kin pyndep ia ka met jongu.
U SP u la kyntu ia ki nongwanjngohkai pyrthei ban ym leit iaid marwei khamtam sha ki jaka khlaw, ki nongwanjngohkai ki dei ban leit lang bad ki nongsynran, ban tip bha ia ka jinglong jingman ki jaka bad ka long kaba donkam ia ki nongwanjngohkai pyrthei na kiwei ki Ri ka long ba kin ai ka jingtip ba bniah ha ki form haba ki la poi ha ki jaka sah jongki khnang ba kan long ka jingiarap lada donkam.
“Haba ki poi ha ki hotel ruh ki dei ban wad ia ki Emergency number ioh ki donkam, namar kane kam dei ka jingjia ba nyngkong, hynrei don bun na ki nongwan jngohkai pyrthei ki ju ngat ha kum kane ka jingjia, ha kaba ki la sahkut lane jah ha kum kine ki jaka, hynrei haba ki phone ia u number 112 ki pulit kato ka thaiñ ki ioh ban ai ka jingiarap sha ki” u la ong.
U la ong ruh ba ka tnad pulit kan shimkhia ruh na ki nongshongshnong ba don ki jaka jngohkai pyrthei bad kin buh ia ki sign ban kdew lynti ia ki nongleit nongwan khang ban lah ban ym bakla lynti ki nong wanjngohkai pyrthei tehlakam ia kum kine ki jingjia. U la kdew ruh ba ka dei ruh ka jingshisha ba u ka kham jynjar ban shem ia u, namar ba ka long riat bad long khlaw bha ka jaka ba lap ia u kumta ngi la shim ka jingiarap na ki nongshong shnong bad ka SDRF bad kumta ka la shimpor ban lap ia u.
Halor ka jingkhlad u Home Guard Constable ha kawei ka shnong ha Assam u SP u la iathuh ba une u Home Guard Constable u ba la tip kyrteng kum u Ribok Dkhar Sawian, u la leit sha NDRF, Tryakshari, Assam ban ioh ka jinghikai pyntbit bad kam dei ha Guwahati, u la jah ha ka 9 Tarik Iaiong ha ka por 7 baje janmiet bad ki lap ia u ha ka sngi ba bud, ki la lap ia ka met jong u ha Goripur Assam.
U SP u la iathuh ba ha ka post mortem ba la dep la lap ba ha ka met jong u ym don kano kano ka jingmynsaw kaba jur lait noh tang ha kawei ka kti jong u kaba lah ban jia na ka jingur jongu. Ki pulit ki la dep ban register case ha Tryakshari Police station bad ka tnad pulit ka Jylla kan iatreilang bad ki pulit ka Kamrup Assam, halor kane ka case.
Ngim lah ban pdiang ba u ur lada u ur un leit poi lei sha ka jaka ba jngai naka jaka sah kata ruh khlem purse khlem mobile. kiba ia don lang ruh ki ong ba u leit sum. Haba peit ha ka dur i thuh ba kala don ka jingiapyneh jingiakhun jong u.kum ka paramarjan bad bahaing jong u nga kwah ba ka bor ba dei peit kan wad bniah haduh ban da lap ia ki jingshisha baroh bad ban ai ka jingsaja ia kiba leh