Shillong:La ujor ha Meghalaya High Court pyrshah ia ka Amrit Cement, kaba dei ka kompeni dewbilat, namar ba katei ka kompeni ka tih mawshun, khlem da don ia ka laisen ban tih mawshun. Halor katei ka jingujor, la bthah ia ka sorkar jylla, ba kan jurip halor katei ka jing ujor pyrshah bad ban sa pyntip sha katei ka kashari bad ka kashari, ba la shong da U bah W Diengdoh, u nongbishar bad U IP Mukerji, Chief Justice, ka la bthah ban shim bishar biang ia katei ka mukotduma, ha ka 10tarik Naitung 2025.
Ha kajuh ka por, ka kashari, ka la iakren biang mynta ka sngi, ia ka rai kaba la shim, ha ka 7tarik Lber 2025 bad katei ka long ban da pynbeit bha ia ki jaka, kiba dei ban ieng kali bad sa kiwei pat ki bym bit ban ieng kali bad nangta ban thied sa 35 tylli ki bos, kiba biang bha, na ka bynta ki khynnah skul, ba kin leit da kitei ki bos ban duna ka jingdheng kali bad nangta la batai ba da ka jingdon ki jaka kiba la mang ban ieng kali bad sa kiwei pat ki bym pat ban ieng, kan duna ka jingpynkhein ain jong ki nongniah kali bad ban lah ruh dain kuna ia kiba ialeh pyrshah.
Ha kajuh ka por, ka tnat pynroi sor jong ka sorkar jylla, ka la phah ia ka kaiphod jongka sha ka High Court, ban pyni ia ki kam, kiba ka la nang iaid shakhmat, katba kum ka jingkwah jong ka kashari bad katei ka jingshong bishar, kan long biang ha ka 21tarik Jymmang 2025, ong ka hukum ba la pynmih da U bah W Diengdoh, nongbishar bad U IP Mukerji Chief Justice ka High Court.
Phi don ban ong eiei?