Shillong:Namar ka jingpyneh jong ka sorkar Assam ban weng ia ki ktem CRPF na poh ka shnong Umlaper kaba don ha block II, na ka liang u MDC ka Mawhati Constituency u bah Charles Marngar, myn hynnin ka sngi u la kyntu ia u myntri rangbah ka jylla u Conrad K Sangma ban phah pulit kham bun sha ka thain Ummat Ribhoi District.
Haba kren bad ki lad pathai khubor, na ka liang u bah Charles, u la iathuh ba katkum ka jing iathuh u SP ka Hamren West Karbi Anglong Assam, la ong ba kane ka jing buh ia ka ktem CRPF hapoh ka shnong Umlaper, ka dei naka bynta ban peit iaka shong suk shong sain haka 15 tarik Nailar, namar ba ka dei ka sngi ban rakhe iaka sngi laitluid ka ri India, hynrei haduh mynta kine ki Pulit CRPF ki dang don hapoh ka shnong Umlaper kaba don ha block II Ribhoi district.
“Ka sorkar Assam ka la buh ia kane ka ktem CRPF hapoh ka shnong Umlaper naduh 9 tarik mynta u bnai daka jing thmu ban tem iaki jing ia kynnad kiba lah ban mih ha ka sngi rakhe sngi laitluid ka ri bad kala don ruh ka jing iapynbeit bad u Superintendent of Police ka Ri-Bhoi District ban weng noh iaki pulit CRPF haka 16 tarik mynta u bnai hynrei haduh mynta ka sorkar Assam ka leh mynthi ia kane” u la ong.
U bah Charles u la iathuh ba halor kane ka la don ruh ka jing iakynduh lang u Superintenden of Police ka Ri-Bhoi District bad u Superintendent of Police ka Hamren West Karbi Anglong, hynrei kane ka jing pynneh jong ka sorkar ban dang phah bteng ka jing pahara iaki pulit CRPF ha kane ka thain ka lah ban buh jing syier iaki paidbah bad kane pynthut iaka iaid ka ieng ki paidbah ka thain.
U bah Charles u la iathuh ruh ba kane ka jing leh ka sorkar Assam ka pyni ba kam burom ia ka jing iakren jong ki myntri rangbah jong ki ar jylla ha ka ba ia dei bad ka mat ban iapynbeit noh ia u pud u sam.
Halor kane u MDC ka Mawhati u la iathuh ba ka jing iakynduh jong u ia u myntri rangbah ka jylla mynta ka sngi kadei naka bynta ban phah weng noh mardor iaka ktem ki pulit BSF napoh ka shnong Umlaper namar kane ka jing don ki CRPF ka buh jing syier pynban iaki paidbah ka thain.
Nalor kane u bah Charles u la ong ruh ba u la dawa na u myntri rangbah ka jylla ban buh daka ktem pulit CRPF ne ki shipai BSF hapoh ka shnong Ummat lada ka Assam kam weng mardor iaka ktem CRPF napoh ka shnong Umlaper.
“Ngi tip ba u Conrad K Sangma ha ka 16 tarik mynta u bnai, u la iakren bad u myntri ka tnat kam pohïng ka sorkar kmie ban phah sa 3 kynhun ki pulit CRPF bad 2 kynhun ki shipai BSF bad nga la dawa na u ban phah da kine hi ki kynhun shapoh ka shnong Ummat ban ai jing shngain iaki paidbah nong shong shnong ka thain” la ban biang u bah Charles.
Haba kylli kaei ka jing kular na ka liang u mynri rangbah ka jylla, u bah Charles u la ong ba na ka liang u Conrad K Sangma u la kular ban iakren bad u myntri rangbah ka jylla Assam naka bynta ban iapynbeit ia kane naka bynta ka shong suk shong sain hapoh ka thain khappud.
Phi don ban ong eiei?