Shillong 15 Iaiong: Ka Green Tec Foundation ha ka jingialam u samla HBN.Nonglang kum u President ka la pynpaw ia ka jingpyrshah jur ia ka jingthmu jong ka sorkar jylla ban wanrah ia ka eco-tourism infrastructure project ha Nongkhyllem wildlife Sanctuary ka ba don ha Ri Bhoi.
Ha ka jylla Meghalaya kidon tang kumba 4 tylli ki Sanctuary ki ba ngi donkam ban iada, ban pynneh pynsah bad ban phikir bha. Ia kane la pynpaw da u President ka Green Tec Foundation, kata u samla HBN Nongtalang haba iakren bad ki lad pathai khubor mynta ka sngi jong ka 15 Tarik u Iaiong 2025.
U samla HBN Nongtalang ula ong, ba la lap ba ka Nongkhyllem Wildlife Sanctuary kadei ka jaka ba la iada bha (PA) ha ka thain shatei lammihngi baroh kawei katkum Ka kaiphod jong ka jingbishar bniah ia ka jingtreikam jong ka jingpyniaid (MEE) jong ki park bad ki jingdon jong ki mrad khlaw.
Kane kan nym long ban shu leit tare kulmar bad kamdei hi ruh ka rukom namar kane ka jingthmu ka sorkar ban wanrah ia kata ka jingshna kan sa pynkhyllem ia ki dieng ki siej, bad ka jingpynjot ia ka Mairang khamtam eh ia ki mrad ba bun jait ki ba don ba katei ka jaka.
U samla HBN Nongtalang u la ong, ba Ka Green Tec Foundation ka ong, ba wat ktah ia ka Nongkhyllem Wildlife Sanctuary namar kam long te kamlong bad kadei ka mat ka ba khia bha.
Ka Green Tec Foundation kadei ka kynhun ba pyndonkam tang da u khulom ym ban iamih da kaba iakhih, hynrei lada ka sorkar kan tei ia kita ki resort ha Nongkhyllem Wildlife Sanctuary ngin sa peit kaei ba kin shim nangne shakhmt.
U la ong ruh, ba Ka ba pynkyndit bad pynlyngngoh kalong ba ka sorkar ka wanrah ia kata ka kompany ban ai haduh 23crore ban tei ia kita ki jingtei hapoh Nongkhyllem ia ki resort, ki water Sports Zone bad kiwei kiwei, da ka ba u kdew ruh, ba ka sorkar ka pyrkhat kumno ba ki jaka ba la iada kyrpang ia ki mrad phin leit ban pynkhyllem ia ki dieng.
Lada ka sorkar ka thmu wanrah ia kata ka eco-tourism infrastructure project kan don beit ka jingpom pathar ia ki dieng, ka jingtieh khyndew bad Ka jingshongsuk shongshngain jong ki mrad ha katei ka jaka kan nym don shuh, la ong u samla HBN Nongtalang.
Ka Nongkhyllem Wildlife Sanctuary bad ka Narpuh Wildlife Sanctuary kidei lypa kita ki eco-sensitive Zone, ha kaba ka ministry of environment forest and Climate Change u 2017 ka ladep ban pynshisha ruh bad ruh kidei ki jaka ki ba la iada bad kamlong ban shu leit tare kulmar.
Shuh shuh u ong, ba Ka Wardlake ne ka Nan Polok mynshwa kadei jong ka Forest Department hynrei mynta pat kidon ha ka jingpeit jong ka Tourism bad ka jingmih ki briew,ka jingiashad iakmen, ka jingiatem bad hato phin dang ioh mrad shuh ha katei ka jaka bad kan long kajuh lada mynta phin ktah ia ka Nongkhyllem Wildlife Sanctuary.
Ka Green Tec Foundation kadei ka kynhun ka ba la tieh bniah hashwa ban leh ia kano kano bad dei halor jong kata ka nongrim kum ka kynhun ngi sngewkhia haduh katta katta ban ktah ia katei ka jaka ban pynthud ia ki mrad, ki sim ki Doh.
Kumta na ka liang ka kynhun hi mar shu ioh jingtip ia kane mar mar ki la pynher da ka jingthoh sha u Myntri badei peit ia ka tnad kam jngohkai pyrthei u bah Paul Lyngdoh ban pynpaw, ba ban ktah ia ka Nongkhyllem Wildlife Sanctuary ka ba don tang kumba 29Sq Kilometre kan dei ka mat ka ba khia bha.
U bah HBN Nongtalang u la ong ruh, ba lada ka sorkar kadon iakata ka pisa haduh 23crore ban shna jingtei leit ai ia kito ki shnong ki ba don sawdong bad katei ka jaka ym ban pynjot bad pynpra ia ki khlaw ban ioh jingmyntoi mano mano.
Phi don ban ong eiei?