Yn ktah ka leit ka wan, ba khang iaid kali biang ka SDO Pynursla

Shillong:Ka Sub-Divisional Officer ka Pynursla Civil Sub-Division ka la pynbna iar sha baroh ki nongleit nongwan bad ki paidbah ba ia ka shi lynter jong ka surok hapdeng Laitlyngkot-Lyngkyrdem kaba don hapdeng na ka 24 haduh 37 km, yn khang bad pyllait iaid kali katkum ka por.

Ha ka jingpynbna mynta ka sngi, ka SDO Pynursla ka la pynbeit por ba ka jingkhang iaid kali kan long naduh 11am-4pm bad kan sdang biang naduh 9Pm haduh 4am bad kane ka sdang naduh ka 7 tarik Naitung haduh ban pynbna da kumwei pat.
Ha ka kyrwoh, ka SDO ka la ong ba ka jingkhang ka long ban pynthikna ban iaid beit iaid ryntih ka jingshna ia ka surok na ka daw ka jingdon ki bynta ba syier ha shi lynter ka surok kiba donkam ban pynkhuid bad pynbha.

Ka SDO ka la kyntu ia ki paidbah ba kin kiar ban leit ban wan ha ka por ba la mang kum ka jingiada na ka daw ka jinglong ka surok bad ka suin bneng.
Ka SDO ka la kyrpad ruh ia ki nongleit nongwan ba kin ai ka jingiatreilang bad ban pynkhreh biang por lypa ban iaid ha ka por kaba pyllait ha kitei ki sngi bad ban bud ryntih ia ki jingbthah naka bynta ka jingmyntoi lang uba bun balang.
Kane ka jingkhang iaid kali, bun kynta kan wanrah ia ka jingthut ha ka leit ka wan jong ki kali ha katei ka thain.