Yn ujor pyrshah ia ki Kuki Zo, ba ki kwah synshar hi

Imphal:Ka sorkar jylla jong ka Manipur ka la rai ban ujor noh da ka mukotduma pyrshah ia ka kynhun seng jong ki Kuki -Zo ba la tip kum ka Indigenous Tribal Leader Forum ( ITLF),hadien ba kane ka seng ka la pynbna ban synshar hi noh dalade ialade ha ki katto katne tylli ki district ha jylla Manipur.

Ka sorkar jylla ka la pynbna ba ka la shim ia ki kyndon ban pyngngat ia ka seng indigenous tribal leaders Forum ( ITLF) bad ki briew kiba don hapoh jong kane ka kynhun kiba la maham ia ka sorkar manipur ba ka dei ban buh ia ka sorkar ba kyrpang ia ki kynhun jaitbynriew Kuki-Zo kaba kine ki jaitbynriew ki dei ban synshar hi, lada kam lah ban ai ia ka jylla ba la ka jong hapoh jong ka artaiew.
Na ka liang u Myntri ki Tnad kam aiñ jong ka jylla Manipur u Th Basanta Kumar, u la ïathuh sha ki nonglum khubor ha ka sngi palei.

Ka sorkar Manipur ka pynremjur ia kine ki jingkren jong ka ITLF ba kin don laka jong ka sorkar ha ki bynta ba bun da ki kynhhun jaitbynriew Kuki -Zo, kane ka thong jong ki ka long ban pynthud ia ka shong suk shong shngaiñ bad pynkheiñ ia ki kyndon jong ka aiñ hapoh ka jylla.
Ka jingialang jong ki MLA ba don ha ka liang synshar ha jylla Manipur ka la long ha ka sngi palei ban pynremjur ia ki jing-kren bad jingkam jong ka ITLF.

Ha ki dur video u secretary jong ka ITLF u Muan Tombing u la ong ba la hynriew tylli ki bnai naduh ba ka jingiakulmar jaitbynriew ka la sdang, hynrei ym shem la don kaei kaei kaba ki la leh haba iadei bad ka jingdawa ban ioh noh ia la ka jong ka jing synshar bad kumta lada ka jingdawa, kam urlong, kumta yn sa buh noh ia la ka jong ka sorkar lada ka sorkar pdeng kan ïthuh ne em.

U Basanta Kumar u ba long ruh ha kajuh ka por u Myntri jong ka Tnad pule puthi, u la pynsahngeh noh shwa ia ka jingdie ia kawei ka kot pule jong ki khynnah klas 11 ba la tip kyrteng kum ka History of Manipur, kaba la ialam bakla ia ka histori jong ka jylla Manipur.
U la ïathuh ruh ba la dep ban thung ia ka komiti ka ban peit bniah ia ki kot kiba lah ban ialam bakla ia ka histori jong ka jylla Manipur.