Shibnai kynthih, kilan met ki shipai ka NATO, ha syndah jong ka Russia

Kyiv: Katba ka thma ha Kyiv, ka dang iai bteng, hynrei ki shipai jong ka NATO, ki la nang ialum lang, ha kine ki sngi ha syndah ka Russia, ban ia kilan met ialade bad la iathuh ba ki don mynta 30 hajar ngut ki shipai ka NATO, kiba wan na ki 28 tylli ki Ri, ban ia kilan met ha Norway, kaba don mar syndah jong ka Russia. Kane ka jingkilan met ka NATO, ka dei kaba heh tam, hadien jong u snem 1980.

Katei ka jingkilan met, ka dei ka ban neh shibnai kynthih, ha kaba da ki phew phew hajar ki shipai na ki ri bapher, kin ia don lang ban ia kilan met bad kaba long ka jing pyni bor, kaba khlain tam, ha ki 30 snem ba ladep. La khlieh ia katei ka jingkilan met, da U Rear Admiral Mike Utley CB OBE, uba dei u heh duh lane u Commander UK Strike Force, uba dei mynta kum u NATO Maritime Component Commander of the NATO Readiness Force.

Ka Norway, ka don tang 200Kilometre ka jingjngai na Russia. Haduh mynta ki don 200 tylli ki liengsuin iapom, 50 tylli ki jhad thma, nalor ki 35,000 ki shipai ialeh bad sa 900ngut ki Royal marine jong ka sorkar Bilat, ki ban lamkhmat ha ka jingialeh thma.