Shillong, 12 Nailur:
Ki nongialam ka BJP ki la ong ba 15 snem ki kam ka sorkar UPA ba ialam da ka seng Congress ha ka ri, ki ia ryngkat bad 2 snem ki kam ka sorkar NDA ba ialam da ka BJP, ia kane la kren da u bah Babul Suting President East Khasi Hills ha ka 10 tarik ha ka jingialang katei ka seng kaba la long ha Krang bad Madan Bitaw kaba hap hapoh Sohiong Konstitwensi. Ha katei ka jingialang ki nongialam ka BJP ki la hiar ban pynsngewthuh ia ki briew ha kitei ki shnong shaphang ki skhim bapher bapher ba la wanrah da ka sorkar BJP bad ka la don ruh ka jingpynrung dkhot ia ki paidbah hapoh katei ka seng.
Ka kong Ester Kharbamon nongialam ka Mahela Morcha ka la kren shaphang ki skhim ba ka sorkar BJP ka la wanrah na ka bynta ki kynthei kum ka baibam tymmen,ka bai bam ia kiba iap lok,ia ki kynthei 11 snem. U bah Kyntiewborlang Syiemlieh General Secretary EKHD u la ong ba ka por ka tyllun hynrei ki nongshong shnong ki sah kumjuh bad ki neh hajuh bad u la ong ba mynta la donkam ia ki jingkylla. Ula ong ba kane ka sorkar mynta kaba synshar ha ka jylla dei ka bym ler hynrei ki im sngi ban wanrah ia ka roi ka par tang na ka bynta ialade shimet.
Ula pynshai shaphang ki jingkynnoh pyrshah ia ka BJP ba ka dei ka seng pyrshah Kristan lane kaba khang bam doh masi hynrei u la ong la ar snem mynta katei ka seng ka la synshar ym pat don kawei ruh ka ing mane kaba shah khang khyrdep lane kam pat don ka jingkhang bam doh masi. Kiwei pat kiba la ai jingkren ki long u bah kordorius Mylliem ( Vice President Yuva Morcha), u bah Hosparly Kharmuti (President Sohiong Mandal ), u bah dondor Rumnong ( i/c EKHD) bad u bah Bat Kharnaior.
Phi don ban ong eiei?