Shillong, 7 Naitung:
U Myntri Rangbah ka jylla Meghalaya u Dr Mukul Sangma u la ong mynta ka sngi Nyngkong, ba ka sorkar kan sa pyn mih sa 36 tylli ki police station thymmai na ka bynta ban pynkhlain shuh ia ka jingtrei kam jong ki pulit. Kane ka jingkren jong u Myntri Rangbah ka lah ban urlong shisha hadien ba u la lah ban thaw saw tylli ki district thymmai shisien leh ha ki snem ba la dep.
U Dr Mukul u la kren ia kane ha ka jingplie ia iing thymmai hapoh Ampati police station. U Myntri Rangbah u la ong ba ka sorkar kala bishar bniah mynta hangno ban buh ia kine ki police station bad ka jingbuh ia kine ki ktem pulit, ka long ban iakhun pyrshah ia ki kam pyntriem bad ki kam runar ruser ha ka jylla.
“Kane ka long ban pynbha shuh shuh ia ka jingtrei kam jong ka tand pulit”, la ong u Myntri Rangbah bad bynrap, ba ka jingthmu halor kane, yn sa pynrulong shen.
U Myntri Rangbah ha kawei ka liang, u la kubur ba ka don ka jingduna birew ha ka tnad pulit ban iakhun pyrshah ia ki nongleh kam sniew bad ia ki kam lehnoh ha kane ka jylla bad, dei na kane ka daw ba ka sorkar mynta kala shim ia kane ka rai ia ka sienjam ban pynkhlain shuh ia ka tnad pulit.
U Dr Mukul u la ong ba ki pulit ki don ka jingiadei bad ki paidbah kaba man ka sngi bad ki long ki nongai jingshngain bad ka long kaba donkam ban tei ia ka jingiadei hapdeng ki paidbah bad ki briew jong ka ain khnang ban tehlakam ia ki kam sniew. U la kyntu ia ki briew ba kin kiar na ki kam ba sniew.
U la pynpaw ia ka jingsngew bynniaw namar ba kumba ka long mynta ki paidbah ki duh ka jingshaniah ha ki pulit bad ki iing bishar na ka daw jong ka jingslem palat ka jingbishar.
U la ong ba ka South West Garo Hills district, kaba jan bad ka Bangladesh la pyndon kam da ki kynhun riew pyntriem kum ka lynti ban rah bor ia ki briew namar ka jan sha Bangladesh bad kiwei ki kam beain.
Phi don ban ong eiei?