Shillong, 13 Lber:
Ka sorkar ka la ong ba ka la dep sam haduh 4,07,012 lak tylli ki Ration Card na ka jingdon baroh 4,22,040 tylli sha ki briew ban ioh jingmyntoi na ka skhim khaw tad ka National Food Security Scheme (NFSS) ha ka jylla.
Haduh mynta, ka sorkar ka la ong ba kane ka skhim NFSS kan ai khaw tad ruh sha ki 70,200 ki briew ba don AAY ha ka jylla.
Ka jingioh khaw kan long 5 kg shi khlieh shi bnai ha ka dor T. 3 shi kilo katba ia u khaw AAY kin ioh 35 kilo shi card ha ka dor T.3 shi kilo.
Kham mynshwa, u Myntri Rangbah ka jylla u Mukul Sangma ba ka sorkar ka la bthah ban pynsangeh shwa ia ka jingpyntreikam ia kane ka skhim namar ba ka la ioh ia ka jingujor na kiba bun ia ka jingdkoh ha ka jingpyntreikam ia kane ka skhim. Ka sorkar ka la bthah ruh ba baroh kiba dei hok ban ioh kim dei ban jah kyrteng ban ioh jingmyntoi na kane ka jaka.
U MLA ka Nongthymmai u Dr Jemino Mawthoh u la ong ba ka sorkar jylla ka la dei ban pynsangeh shwa ia ka jingpyntreikam ia ka skhim khaw tad ka National Food Security Scheme (NFSS) ha kane ka jylla namar ba ka la don bun ka jingmih ka kynrum kynram ha kane ka jylla.
U Dr Mawthoh u la ong ba u la ioh shibun ki jingujor ia ka jingdkoh ha ka jingpyntreikam ia kane ka skhim ha ka jylla khamtam ha jaka sor ha kaba bun bah ki briew ba dei hok kim shym la mih kyrteng bad don ruh kiba la mih kyrteng sha kawei pat ka jaka kaba la pynkulmar thlim ia ki paidbah.
“Ha ka jingsngew jong nga, la dei ban pynsangeh shwa ia ka jingpyntreikam ia kane ka skhim namar ba ka donkam ban pynbeit shwa ia ki jingdkoh”, la ong u MLA ka Nongthymmai.
U la ong ba ka katkum ka jingtip ba la ioh, ia ka khanasumari la leh da ka tnad Khein Briew ne ka Census katba ia ka kyrteng la phah sha ka tnad Sam Marbam (Supply) bad dei na kane ka daw, ba ka sa mih ka kynrum kynram.
Ka jingbym paw kyrteng jong ki briew kiba la dei hok ban ioh ka dei kawei kaba ka sorkar jylla ka dei ban pyrkhat bha ban pynbeit ia ka jingtreikam haduh ban pynrung lut ia baroh kito kiba dei hok.
Wat ka KSU bad bun ki shnong ha sor, ki la pyrshah jur ia ka jingpyntreikam ia kane ka skhim khaw tad (NFSS) hadien ba ki la lap ba bun ki trai jaka kiba dei ki Khasi, kim shym la ioh ne mih kyrteng satia katba ki dkhar kiba shu wan nabar ruh, ki la ioh rung lut plain ban ioh jingmyntoi na kane ka skhim.
Phi don ban ong eiei?