Nongpoh, 16 Nailur:
Ki dkhot ka Hynniewtrep National Youth Front (HNYF) Northern Region, mynta ka sngi ki la ioh ban kurup haduh 8 tylli ki tyndong lyer shet, na kawei ka Auto Rickshaw kaba don ia u number ML 10A 7673, na jan ka Amit Restaurant kaba don ha Nongpoh.
Ia utei u nongsam beain ia kitei ki tyndong lyer shet, la tip kum u Bajan chakraborty na Byrnihat bad ha ka jingtohkit da ka HNYF, u la iathuh ba ia kine ki tyndong lyer, kaba u la wan ban sam beain sha ki Restaurant bad Hotel, u la ioh na ka Wankhar Gas Agency kaba don ha Byrnihat.
Kumta hadien ka jingtohkit ia utei u nongsam beain ia kitei ki tyndong lyer, na ka liang ki nongialam ka HNYF, Northern Region, ki la aiti noh sha ki pulit ka Nongpoh Police Station, khnang ba kin ioh ban leh ia kaba donkam bad ban pynshitom ia utei u briew, uba sam beain ia kitei ki tyndong gas, katkum ki kyndon jong ka ain.
Haba iadei bad kane na ka liang u Bah Marcus Marten, President ka HNYF, Northern Region, u la ong ba na ka liang ka seng ka kyntu ia ki bor ba dei peit ba kin shimkhia na ka bynta ban pynlong ia ka jingkhynra kaba man ka por, khnang ban khanglad ia kiba kum kine ki jingsam beain ia ki tyndong gas.
U la ong ruh ba kumba ka long mynta, ki paidbah ki shem jingeh ban ioh ia ki tyndong gas ha ka por kaba biang, hynrei ka long pat kaba lyngoh pat ba ia ki tyndong gas kaba dei ban sam sha ki paidbah la sam pynban sha ki Hotel bad Restaurant.
Khadduh eh na ka liang ka seng kyntu ia ki bor ba dei peit ba kin leh da kaba tyngeh ia kino kino ki Gas Agency, kiba donkti ha ka ban sam beain ia ki tyndong gas sha ki Hotel bad Restaurant, u la bynrap.
Phi don ban ong eiei?