Shillong, 8 Naitung:
Khyndai ngut ki dkhot jong ka seng runar ka A’chik Songna An’pa chakgipa Kotok (ASAK) ki la shah kem mynta ka sngi na ki thain bapher ba pher jong ka William nagar ha East Garo hills district.
Kine kiba shah kem ki kynthup ar ngut ki nongialam ba kham ha khmat kiba bat kum ki Area Commander (AC).
Ki ar ngut ki nong ialam kiba paw khmat kiba shah kem ki dei u Area commander jong ka Wil liamnagar East u Merak Sangma ba khot sin kum u Suanggre bad u Operational commander u Dinesh Ch Marak ba khot sin kum u Blackboard. Ia kine ki khyndai ngut la ioh kem da ki pulit ha ka jingkynra hynne ka step ha ka thain Williamnagar bad Rongjeng, la ong u heh pulit.
Hynriew ngut la ioh kem na Williamnagar bad lai ngut na Rongjeng.
Nalor kine ki ar ngut ki nongialam ba la shah kem, kiwei pat ki ba la shah kem ki kynthup ia u Minibirth Sangma, u Pagal Sangma ba ju khot u Balwa, u Walman Sangma, u Isak Sangma, u Selbi Arengh, u Sabat Marak bad u Rikran Momin.
Ki pulit ki la iathuh ba kine ki dkhot jong ka ASAK kiba la ioh kem hynne ka sngi ki dei ki dkhot barim jong ka Garo National Liberation Army (GNLA) bad ki dei kiba la thwet jur da ki pulit ka Garo hills namar ka jingdonkti ha ki kam pyniap bad rahbor.
Ka ASAK ka dei ka kynhun ba la thaw da u nongialam barim ka GNLA u Reading T Sangma.
Katkum ka jingiathuh jong kitei ki dkhot ba shah kem ha ki pulit, u Commander-in-chief ka GNLA u Sohan D Shira u la lum spah da ki klur na ki kontraktor, ki nonghaii, ki kompeni BSC C&C bad na ki nongkhaii dewiong.
Katkum ka jingiathuh jong kitei ki dkhot ka ASAK, u Sohan u la kamai spah haduh T.30 haduh T. 40 klur bad ka GNLA mynta ka kwah ban don ka jingsangeh iasiat bad ka sorkar khnang ba un lah ban iakhun ia ka elekshon Garo Hills Autonomous District Council.
U heh pulit, u la ong ba kitei ki dkhot ka ASAK ki la diaw ia ka jingleh jong u Sohan uba rhah ia ka pisa bad ki la phet noh na ka seng GNLA bad ki pyniasoh bad ka kynhun jong u Reading bad ki la thmu ban ai jingsneng ia u Sohan namar ka jingshet kylla ia ki paidbah Garo.
Ki la iathuh ruh ba u Reading T Sangma uba dei u Coomander jong ka ASAK, u la don ka jingiapher jingmut bad u Sohan bad u la mih noh na ka seng hadien ba u Sohan u la pynhiar na ka kam Finance Secretary sha ka kam Grievance secretary ka GNLA.
“Katkum ka jingiathuh kiba shah kem, u Sohan D Shira u la pyndonkam ia ka jait Shira ban long ki dkhot ba kham hakhmat bad u la thung ia u D Shira kum u Area commander ka GNLA, u Rakkam kum u Area Commander ka Nongwalbibra. U Piliport D Shira kum u Area Commander ka Resu” la ong u heh pulit.
Na kine ki dkhot ka ASAK, la ioh kurup 3 tylli pistols, ki tiar ialeh bad kiwei ki kot ki sla.
Phi don ban ong eiei?