Ki shipai Comman do jong ka Israel, ki la hiar da ka thma sha ki bynta jong ka Gaza mynta ka step, kaba dei ruh ha ka sien kaba nyngkong eh jong ka jinghiar thma ha ryngkew da ka Israel ban ialeh pyrshah ia ki ehrang Hamas.
Ha katei ka jingjia, la iathuh ba ki don saw ngut ki shipai jong ka Israel, kiba la mynsaw bad ka jingthmu jong ka Israel, ka long ban pynjot thiaw ia ka jaka, kaba dei kaba la ju pynher nam ding ban siat sha Israel.
Ki shipai jong ka Israel, ki la pynhap ruh ia ki kot lyngkdop, ba ki nong Palestine, ki dei ban mih na la ki iing jongki ha ki bynta ba shatei jong ka Gaza, ha shwa ba kin hiar thma bad la iathuh ba ha kane ka jingjia haduh mynta, ki don 160ngut ki briew kiba la iap na ka liang jong ka Palestine, ha katei ka jinghiar thma kaba lyngkot bad kaba shipor jong ka Israel, kaba sdang ha ka por 9baje mynstep, ha ka por jong ka GMT.
Ym pat don uwei ruh u nong Israel, uba la iap, ha kane ka jing siat nam ding jong ki ehrang ia ki jaka bapher jong ka Israel. Ka Israel, kam shym la sngap, ia ka jingkhot jong ka pyrthei ban sangeh noh, na ki kam ialeh thma, hynrei, ka la ther da ki liengsuin iapom jongka, hynnin ka sngi, ha kaba kawei ka liengsuin iapom, ka la bret bom ha kawei ka iing, ba ki shong ki sah, ki briew kiba anna bad kaba la pyniap ia 2ngut ki briew bad pynmynsaw ia 4ngut kiwei pat.
Kawei pat ka jingther bom, ka leit khyrwit ia ka iing sah jong U Taysir al-Batsh, u heh pulit jong ka Gaza bad nangta ka la pynjot thiaw ruh ia kawei ka iing mane Muslim, ha kaba la pyniap ia 18ngut bad pynmynsaw ia 50ngut kiwei pat, kiba dang ia duwai janmiet, kaba dei hynnin ka sngi hi.
Mynta ka sngi, la sdang pynkynriah ia 800ngut ki nong Palestine, kiba don ia ki passport jong ki Ri kiba na shabar bad sa 300ngut ki nong America, na ki bynta jong katei ka jaka kaba don jing ia kynad ha Gaza.
Ka Israel, ka ong ba ka jinghiar thma ha khyndew, ka dei kawei na ki lad jong katei ka Ri, ha kaba la pynkhreh ia 20,000ngut ki shipai ba kin hiar thma, wat la bun bah, ki jinghiar thma, ki long kiba na suin, ha kaba la ther haduh 1,200sien ha ki bynta jong ka Gaza.
Phi don ban ong eiei?