Shillong, 13 Naitung:
Ka bor synshar District ka la pynlong ka jingleit jurip ba kynsan kynsan ia kiba bun ki dukan ha Iewduh bad ha kiwei ki jaka sor hadien ba ki la ioh ka jingujor ba ka la don ka jingpynkiew dor ba kynsan kynsan ia ki mar bam mar dih kham tam eh ia u piat haduh 70 tyngka shi kilo.
Ka bor district ka la leh ia kane namar ba ki ioh jingtip ba don ki briew ba pynkiew dor dusmon ia u piat na ka 30 tyngka sha ka 70 tyngka ha ki jaka kum ha thain Laban bad ha kiwei ki jaka sor.
Kumba long mynta ka dor jong u piat ha iew ha Iewduh ka long kumba 35 haduh 40 tyngka shi kilo hynrei ki don ki jaka ba la die ia u piat haduh 70 tyngka shi kilo.
U Deputy Commissioner jongka East Khasi Hills u Sanjay Goyal u la iathuh ba ki bor synshar District ki la shim khia ia kane ka kam hadien ba ki la ioh ka jingujor na kiba bun ba lang halor kajingkiew dor jong ki mar ki mata khamtam eh u piat bad ki la leit jurip ruh hynnin ka sngi sha kiba bun ki jaka ba la lum thup ia ki mar bam mar dih jongki paidbah.
Hynrei ha kane ka jingjurip, khlem ioh kem iano iano namar ba ki dukan ki kam ba ki die beit kumba long ka dor iew bad ki khlem pynkiew dor eiei. U DC u la iathuh ba ki bor synshar district kin iai bud dien bad talasi ia katei ka kam bad lada ki lap ia kiba leh tam kin kem bad pynngat ia ki ha ki kyndon ain ba pyrkhing bha.
Phi don ban ong eiei?