Shillong:U CEM ka Khasi Hills District Council u bah Titostarwell Chyne, u la ong ba yn sa khot da ka jing ia lang jong baroh ki District Council, halor ban pynpaw ia ka jingpyrshah ia ka jingai jingmut jong ka Parliamentary Standing Commitee ha ka ba ia dei bad ka jingpynkylla ia ki katto katne ki mat kiba ia dei bad ki District Council.
Haba ia kren bad ki lad pathai khubor, na ka liang jong u CEM u la ong ba ka jingai jingmut jong ka Parlianmentary Standing Commitee, ha ka ba ia dei bad ka jingpynkylla kaba 125 jong ka Sixth Schedule.
U la ong “Hadien ba la iohi ia kane ka kaiphot ha ka website jong ka parliament kaba la paw shai ba ki khlem sngap ia ka jingai jingmut jong ngi bad jong ka sorkar Jylla, na ka liang ka EC ki la phah ia ka jingpyrshah lyngba ka tnad ka District Council Affair bad sha ka Home Ministry ba ngi pyrshah ia ki katto katne ki mat kiba ym sngew ia hap.”
Kawei na kine ki mat ka long halor ka Nomination of Unrepresentative Tribe ha kaba kane ka committee ka khlem sngap ia ka jingai jingmut, ha kaba ki la phah ban pynkylla ia ka Unrespretive Tribe bad ki dei ban buh beit tang Nominated ha ka ba kan shong beit ia u lat ka jylla ba un jied iano bad kane kan sa mih ka jing pynkulmar jing mut khamtam ha ka por ba shong dorbar namar haduh mynta ha Dorbar jong ka Council ki dang kren da ka ktien lajong.
U la ong ruh ba halor ka Village Council bad Municipal Council ruh ka Council kam sngew iahap, namar kane ka long pyrshah ia ka Riti shynshar jong ki Rilum khasi bad halor kane na ka liang jong ka Council ki dawa ba ki dei ban ithuh ia ki Dorbar shnong kum ba la ithuh da ka Constitution jong ka Ri India.
Halor ka jingiadei bad ka number jong ki seat ka jingpynheh ia ki number jong ki seat ka dei ban long 37 ngut kynthup ia ki 35 ngut kiba la jied da u paidbah bad 2 ngut ki dei kiba shu thung hi da u Lat ka jylla bad na pdeng kine 2 ngut ki ba shu thung iwei i dei ban long i kynthei bad ka Council kam ia hap ia ka jingpynkiew jong ka Commitee sha ka 40 ngut.
Ka Council ka dawa ruh ban pynkylla noh ia ka paragraph 20 jong ka Sixth Schedule ha kaba kane ka jingpynkylla ka long ban pynhap noh ia ki 3 tylli ki Municipal Area sha ka District Council. Kawei ka ba ka Council kam ia hap ka long halor ka jingbuh ia ka kyntien President jong ka para graph 12 a,b jong ka Sixth Schedule bad haka jaka jong kane dei ban buh ia ka kyntien u Lat ka jylla bad kane ka long ban ai bor ia ki Council tang lyngba u Lat ka jylla ba un lah ban kyntait ha kaba ia dei bad ka jing pyntrei kam ia ki ain ka sorkar kmie bad ban pynbeit ia ka rukom trei kam.
Kawei ka long halor ka bor jong ka Article 200 ka dei ban trei kam ha ki Sixth Schedule ha kaba kane ka Article 200 ka dei halor ka jingioh jingmynjur ia ki Bills ki ba la pass da ka ingdorbar jong ka Council bad haba u Lat shisien ba la phah ia kano kano ka Bill ka ba la pass da ka Council bad lada u phah biang ban pynbeit bad lada la phah biang ia u ha ka sien ka ba 2, un ym lah ban kyntait shuh ia kane ka Bill.
U la iathuh ruh ba don na ki katto katne ki jingai jingmut jong ka ne ka Commitee ha kaba ia dei bad ka Article 280 ha kaba ia dei bad ka Direct Funding, ka jingweng noh ia ka Dual Post ka jingpynkylla ia ka KHADC sha ka Khasi Hills Territorial Council.
Phi don ban ong eiei?