Nongpoh:Haba iasnohktilang ban rakhe ia ka World Toilet Day, ka District Swachh Bharat Mission (Grameen), mynta ka sngi ki la pynlong ia artylli ki prokram ba kyrpang, kata kawei ha Saiden, ba la wan ia shimbynta da ki nongialam shnong kiba hap ha ka thup khap sor lane Urban bad kawei pat kiba ki la pynlong ha ophis PHE Nongpoh, la rakhe kum ka jinghikai na bynta kito ki shnong Nongkyndong.
Kiba la wan iashimbynta ha ka prokram ha Saiden, ki kynthup naduh u Bah U. Kurbah, SDO, u Bah S. Langstieh, Asst. Engineer ka PHE Nongpoh, ka Kong Alvareen Shangpliang, District Co-ordinator Swachh Bharat Mission, u Bah E. K Lapang, Rangbah shnong Saiden lem bad kiwei.
Haba iadei bad ka prokram kaba ki la pynlong ha ophis PHE, Nongpoh kaba dei na ka bynta ki shnong kiba hap ha ka thup rural, la pynlong ia ka jingiakop dro dur bad airong, ia kaba la wan iashimbynta da ki khynnah na ki jaka bapher bapher bad ha katei ka prokram, ka Kong RM Kurbah, Deputy Commissioner Ri Bhoi, ka la long kum ka kongsan, ha ryngkat ka jingdonlang kiwei de ki heh ophisar na ka tnat PHE. Lyngba katei ka sngi, ka Kong RM Kurbah, DC Ri Bhoi, ka la ioh ban sam ia ki syrnot ha ryngkat ka song pisa sha ki rangbah shnong, namar ka jinglah jongki ban wanrah ia ka shnong jong ki ba kin ioh ia ka nam kum ki shnong ba khuid suba.
Phi don ban ong eiei?