Nongpoh, 13 Naitung:
Ka jingangnud jong ka KHADC ban kyntiew ia ki Ïew ki Hat ban pynkylla dur thymmai ia ki katkum ka jingiaid ka por ka la pynlong ia ki EM ka KHADC ban hiar jurip ia ka Ïew Byrnihat mynta ka sngi.
Katei ka Ïew ka long kawei na ki Ïew khappud jong ka Rilum Khasi kaba heh bha bad kaba don ha Ri-Bhoi district bad ba na ka liang ka KHADC ka thrang ban pynkylla ia ka kum kawei na ki Market Complex khnang ban kyntiew khambha shuh shuh ia ka ioh ka kot bad ka roi ka par jong ki paidbah ha ki kam khaïi pateng.
La ialam ia katei ka jingjurip da u Deputy CEM ka KHADC, u Bah Teinwell Dkhar, uba peit ia ka Development, Planning bad ka Art and Culture bad u Bah Donkupar Sumer, EM ka Market, u Bah Hadrian Lyngdoh, EM ka Council Building, ka Kong Rona Khymdeit, EM ka Law and Legal Matters, Marriage and Divorce, ki ophisar ka KHADC, ki nongialam shnong ba kynthup ruh ia u Bah Johny Syiem, Rangbah Shnong ka Lumnongrim, u Bah P Syngkli, Lyngdoh ka Raid Nongkyrla bad kiwei kiwei.
U Bah Donkupar Sumer haba kren bad ki lad pathai khubor, u la ong ba ka jingthmu ki EM ka long ban pynwan dur thymmai noh ia katei ka Ïew ia kaba la mang ban shna ia ka na ka 14 Finance Commission khnang ba yn lah ban kyntiew ia ka ioh ka kot ha ka khaïi pateng jong ki paidbah nongshong shnong kiba die ba thied bad kiwei kiwei ki jingdonkam.
U la ong ruh ba ia mynta hi la shem ba kane ka Ïew kam pat bit pat biang bha bad donkam ba kan don ki dukan kiba bha bad ki surok lynti syngkien hapoh jong ka kiba biang katba kum ka jingiaid ka por, yn pyrkhat bha ruh ban shna ia ki nala um ba paka bad kiba lah ban pyntuid um jaboh, khnang ban pynsuk ia ki nongwan thied wan pet bad ban pyllait ruh na ka jingsniew ha ka koit ka khiah.
Phi don ban ong eiei?