Ka elekshon komsihon mynta ka sngi, ka la buh tarik ia ki sngi thep vote ha ki Jylla ha Madhya Pradesh, Rajasthan, Mizoram, Chhattisgarh bad ha Telangana. Kitei ki elekshon ha kitei ki san tylli ki Jylla, yn pyndep ha shwa ka 7tarik Nohprah bad ka jingniew vote, kan long ha ka 11tarik Nohprah 2018.
Haba kren sha ki kotkhubor mynta ka sngi, U OP Rawat Chief Election Commissioner, u pyntip ba ka elekshon ha Chhattisgarh, yn pynlong ha ki ar bynta, ha kaba ka jingthep vote kan long ha ka 12tarik Naiwieng 2018, na ka bynta 18 tylli ki Constituency bad nangta ha ka 20tarik Naiwieng, na ka bynta ki 72 tylli kiwei pat kiba dang sahteng
Ka Madhya Pradesh bad ka Mizoram, kin thep vote ha ka 28tarik Naiwieng 2018, katba ka Rajasthan bad ka Telangana, kin thep vote ha ka 7tarik Nohprah 2018.
Ka elekshon ha Telangana, la pynlong noh kham kloi, hadien ba u myntri rangbah katei ka Jylla, U K Chandrashekhar Rao, ula pynkut noh ia ka por trei kam jong kane ka iing dorbar kaba mynta, ha u bnai ba ladep.
Ka iing dorbar jong ka Mizoram, kaba don 40ngut ki dkhot, kan kut ha ka 15tarik Nohprah 2018.