Nongpoh, 13 Naitung:
Ka Khasi Students’ Union (KSU), Umsning Circle hadien katto katne sngi ba la don ka jingleh pathar jong ka Kompani ri syiar, ka Meghalaya Agrovet Pvt Ltd ha Mawthei, jan Khliehum trew, ia ka umdih ba ki nongshong shnong ka thaiñ Umsning ki pyn donkam ia ka um na ka skhim jong ka PHE kaba la don naduh ki phew tylli ki snem mynshuwa, hynnin ka Sngi Saitjaiñ, katei ka seng ki samla pule ka la hiar sha katei ka jaka ri syiar ban jurip ia ka jinglong jingman jong ka.
Katkum ka jinglap ki stad wad bniah ia katei ka umdih, kiba dei na ka King Edward VII Memorial Pasteur and Research Institute, ki la lap ba katei ka umdih kam long shuh ban bam ban dih, namar ka la long bih. Kumta ka KSU ruh ka la pynrem jur hadien ba la lap pylleiñ hynnin ka sngi ia katei ka tyllong umdih kaba wan na ka Wah ha Khliehumtrew, Mawthei ban tan sha ka top um kaba don ha ka shnong Syad heh bad na katei ka top um ban sam ne pynpoi sha ki shnong ki thaw jong ka thaiñ Umsning bad kaba poi ruh sha ki shnong Nongjri bad kiwei kiwei, lait noh na ka shnong Nongthymmai kaba la ioh la kajong ka tyllong umdih.
Ka KSU hapoh ka jingialam u president jong ka Umsning Circle, u Samla Peterson Kylla, la synran lang da ki nongialam ka Circle, ki la leit jurip bad ki la pynrem jur ia katei ka kompani kaba la shna ia katei ka jaka ri syiar khlem da don ki jaka ba biang ban kynshew ia ka eit jong ki syiar, hynrei ka la pyntuid beit ia ki sha katei ka tyllong umdih kaba la wanrah ia ka jingma ia ka koit ka khiah jong ki shnong ki thaw kiba don ha ka thaiñ jong ka sor Umsning hi baroh kawei.
U Samla Peterson u la ong ruh ba dang shen ki Rangbah Shnong bad ka synjuk jong ki, ki la pynlong ia ka jingjurip bad dawa ba dei ban pynsangeh noh ia katei ka jaka ri syiar kaba la ktah ia ki paidbah wat ki bor district ruh ki la wan jurip ia katei ka jaka ri syiar hynrei haduh mynta ym pat shym la pyntreikam ban pynsangeh noh ia ka, kaba kum ka KSU ka la byrngem ba mynta ka kynti kam banse ban khang tala noh ia katei ka jaka ri syiar kaba la ktah ia ka bha ka miat bad khamtam ia ka koit ka khiah kumba la lap lyngba ki stad wad bniah ia ka jinglong jingman jong ka umdih.
Ka KSU kan leit kynduh ruh ia ka DC ha Nongpoh ban iakren ia kane ka phang bad lada kane ka jingiakren na ka liang ka DC kam shimkhia, ka Seng kam banse ban shim ia ka sienjam jong ka, ban khang tala syndon ia katei ka kompani kaba la pynjynjar ia ki paidbah ka thaiñ, u la ong.
Phi don ban ong eiei?