Shillong, 15 Rymphang: Ka seng ki nongniah taksi ka East Khasi Hills Local Taxi Welfare Association (EKHLTWA) ka la byrngem ujor ejahar kylla ia u pulit ophisar u Myntri Rangbah ka jylla u Mukul Sangma, lada ka Kashari kam pynphai ia kane ka mukotduma sha ka tnad Traffic Branch kaba peit ia ka jingpyniaid kali.
“Lada ka kashari kam phah ia kane ka mukotduma sha ka Traffic Branch ban pynbeit, ma nga bad ka seng taksi ngin ujor ejahar kylla ia u Smith Mawkhniang u pulit ophisar uba ujor ejahar ia u nongniah kali Sumo”, la ong u Bah Disparsing Rani u nongai jingmut ka EKHLTWA haba kren sha ki lad pathai khubor hynne ka sngi.
“Ha khmat ka ain, baroh iaryngkat ha India, imat ka ain ka treikam tang ia uba rit ba ria” la ong u Bah Rani.
Ia u Bah Jeskalur L Mawdoh u nongniah ka kali kamai Mahindra Max ( ML-04A-3374) la pynngat ha ka kyndon 307 ka Indian Penal Code (IPC) hadien ba ka kali jongu, ka la iatakhuh bad ka kali ba shong u Myntri Rangbah ka Honda Accord (ML-01-0001) ba niah da u P Lyngdoh ha ka 11 tarik mynta u bnai ha Laimer, Shillong.
La iathuh ba u Bah Mawdoh u la takhuh bad ka kali u Myntri Rangbah namar ba u la pyrshang kiar na kawei ka scooter.
“U Myntri Rangbah kum u kpa jong ngi, u la dei ban iohi ia ka jingbakla barit baria jong u nongniah kali bad u dei ban tuklar ban nym pynngat ha kano kano ka ain pyrshah ia u nongniah katei ka Mahindra” la ong u Bah Rani.
Ka jingpynngat mukotduma ia u nongniah ka Mahindra Max ha ka ain thmu pyniap briew, ka dei ka bym dei katkum ka riti synshar ka ti, la ong biang u Bah Rani.
“U Myntri Rangbah u la dei ban ap ia ki pulit pyniaid kali ban wan ha katei ka jaka bad ban shon dur ia ka jingjia” la ong u Bah Rani bad bynrap, tang namar ba dei u Myntri Rangbah u phet bak bak na katei ka jaka khlem ap ia ki pulit pyniaid kali ban poi ban eksamin ia ka jingjia.
U general secretary ka EKHLTWA u Bah Wandonbok Jyrwa u la ong, “U Myntri Rangbah u dei ban tuklar ia kane ka jingjia ban iakren pynbeit ym ban nym ujor sha ka ain namar ba ka dei ka jingjia jong ka jingbakla ba malu mala, ym ban pynngat ha ka ain 307 ka Indian Penal Code (IPC). U nongniah katei ka kali kali u kit ia ki nongleit nongwan ban leit buh sha jaka jongki”.
U la ong ba lada u nongniah katei ka sumo u mut ban pyniap, u la dei ban pyniap shwa ia ki nongshong kali.
“Ngi kyntu ia ka Kashari ban pynphai ia kane ka mukotduma sha ka tnad Traffic Branch bad lada kam leh, ngin hap ban ujor ejahar kylla ia u Mawkhniang,” la ong u Bah Jyrwa.
U la kyntu ia ka All Meghalaya Maxi Cab ban wan shakhmat, ym ban shaniah tang ha ka East Khasi Hills Local Taxi Welfare Association (EKHLTWA).
Phi don ban ong eiei?