Shillong, 11 Lber: Ka Myntri kam pohiing ka jylla ka Kong Roshan Warjri ka la ong ba ka sorkar jylla kam don jingtip ba ka don ne em ka jingduna doh masi ha jylla namar ka jingioh lad ban shalan tuh ia ki masi sha Bangladesh.
Haba jubab ia ka jingkylli mynta ka sngi hapoh ka iing dorbar thawain ba la wanrah da u nongialam liangpyrshah u Dr Donkupar Roy uba kwah tip la ka long kaba shisha ne em ba ka jylla ka duna doh masi namar ka jingshalan tuh sha Bangladesh, ka Kong Roshan ka la ong ba kam bna eiei la ka don ne em ka jingduna doh ha iew. “Ngam tip eiei ia kane”, la ong ka Kong Roshan.
Ka kong Roshan ka la kubur ba ka la don ka jingshalan tuh ia ki masi sha Bangladesh bad ki pulit ki la ioh kurup 1065 tylli haduh mynta ki masi.
Ka la ong ban tehlakam ia kane, ka sorkar ka la don ka jingiatreilang hapdeng ki shipai BSF.
Katba u MLA ka Nongkrem u Bah Ardent M Basaiawmoit uba la wanrah ia ka jingkylli halor kane ka mat, u la ong ba lada ka sorkar kam lah ban khang lad ia ka jingkhaii masi beain sha Bangladesh, kan bha ba kan shu thaw noh da ka ain ban ioh khaii laitlud.
U Bah Ardent u la ong, “Dei ban pynlong ain noh ia ka khaii masi lada ki pulit kim lah ban tehlakam ia ka jingkhaii tuh ia ki masi”.
U Bah Ardent u la ong ba ki pulit ki la phiel ban khang lad ia ka jingkhaii masi ha kane ka jylla kumba ka paw, bad kaba lyngngoh ka long ba ia ki nongkhaii tuh ia ki masi, la ioh bat da ki dkhot ka seng ki nongotdoh ka Khasi Jaintia Butchers Welfare Association (KJBWA). “ki pulit kim leh eiei ban kem ia kiba khaii tuh masi hynrei dei ki dkhot ka KJBWA kiba ioh bat”, la ong u Bah Ardent.
U la ong ba ka long kaba lyngngoh ba ki pulit kim lah ban iohi ban kurup ia ki masi kiba la shalan tuh da ki spah tylli sha Bangladesh ha kine ki sngi.
U la kyntu ia ka sorkar ba ka dei ban ai bor ha ka KJBWA ban pyniaid ia ka shalan thied masi namar ka tip bha ia ki briew kiba dei hok ki nongkhaii bad ki bym dei kiba thmu ban shalan tuh sha Bangladesh.
Phi don ban ong eiei?