Shillong, 13 Jylliew:
Ka Myntri bylla ka jylla ka kong Ampareen Lyngdoh ka la ong ba ki nongbylla ba wan nabar jylla ki hap ban buh ne rejister kyrteng katkum ka Inter-State Migrant Workmen (Regulation of Employment and Condition of Service) Act, 1979.
“Ka sorkar jylla ka la kut jingmut ban pyntrei kam ba ki nongbylla nabar ki hap ban buh ne rejister namar ba ka sorkar ka sngew khia ia ka jingwan rung ki briew nabar”, la ong ka Lyngdoh hapoh ka iing dorbar thawain ka jylla hynne ka sngi Thoh dieng.
Katkum ka jingong ka Kong Ampareen, tang u nongwanrah ia ki nong bylla bad u kontrak tor ki rejister bad ki la aiti ia ki kyrteng jongki bad ka kyrteng ki nongbylla jongki.
Haba jubab ia ka jingkylli, ka Kong Lyng doh ka la ong ba ki nongbylla kiba wan bylla hapoh kane ka jylla ban wad kam, kim hap ha kane ka ain.
“Ngim don ka ain kaba tehlakam ia kito kiba wan bylla ban wad kam ha kane ka jylla. Ka sorkar ka leh ia kam katkum ka ain” la ong ka Kong Ampareen.
Shwa ia kane, u MLA ka Sohra u Bah TW Chyne u la ong ba ka sorkar kam shim khia eiei ban tehlakam ia ka jingwan ki briew nabar khamtam kiba wan bylla bad kane ka la ktah jur ia ki trai jylla.
“Nga tip ba ki nongpyntreikam ne u nongwanrah nongbylla kim ai ia ka jingtip kaba biang ia ki nongbylla ba ki wanrah. Ka tnad bylla ka jylla ka dei ban ai work permit sha kine ki nongbylla kiba wan sha kane ka jylla bad ban tohkit bniah ia ka jinglong jongki”, la ong u MLA ka Sohra.
Phi don ban ong eiei?