Ka bih Uranium ha Domiasiat

U Dr Wanbantei Bremley Lyngdoh, ula sei madan ia ki jing shisha ha kine ki sngi, halor kata kaba u ong “ka bih uranium” lane ka radiation, kaba la ju iakren, da ki phew snem ba ladep, halor ka kam tih Uranium ha Domiasiat, South West Khasi Hills. Utei u samla rangbah, u rah da ki tiar ki tar, kiba u pyn shisha, ia ka jingdon jong ka bih Uranium ha ka thain Nongbah Jynrin, kaba don ka pung, kaba la pyllang ia ka jaboh, kaba la sei na ka jingtih Uranium bad u da kren kob ruh, ba haduh mynta ka Pollution Controll Board jong ka Meghalaya, kaba dei ka tnat kaba peit ia ka jing jaboh jong ka mariang, kam don satia ia ki tiar ban thew ia ka jingma, kaba mih na ka lyer bih Uranium.

Ka sorkar Jylla, haduh mynta, kam shym la pdiang ia ka jingtuid katei ka jaboh, na kitei ki pung kiba la set ia u uranium, hynrei utei u stad mariang, u pyn thikna, ha kaba ula iohi, da la ki jong ki khmat bad ba u don da ki tiar, ban pyni ba katno ka khlain bor bha, ka radiation ha sawdong ka jaka tih Uranium bad ha ka wah ruh, kaba don ha katei ka thain.

Ka mat, ka dei kaba khia bad kaba kongsan shibun eh bad lada jia ba kawei ka kynhun ka pynksan jubor ialade, ka dei ka pap ka sang bad lada kawei pat ka kynhun (ka sorkar), ka batai stad than ialade ruh, hangta ruh ka dei ka jingkren bieit pynban, namar ba katei ka dei ka kam kaba iadei bad ka jingstad saian bad ha kajuh ka por, kaba dei ruh ia ka mat jong ka koit ka khiah jong kito kiba shong sha ka thain Domiasiat.

Ban ia poi sha ka bynta ban kham ia shai, ka la dei namarkata ia U Bah Bremley; ka KSU lem bad kiwei ki seng bhalang, ba kin wad jingtip shwa ia ka koit ka khiah jong ki briew, kiba don sha katei ka thain bad ia kiei ki jait jingpang ba ki don bad lada ki la lah ban pyn sabut na katei kawei ka liang, kumta, ka la dei shisha ka bynta kaba khia bad ka sorkar Jylla lei ka don ia shibun ki jaka sumar pang ha katei ka thain bad ka la dei ban sei ia ki jing shisha, halor ki jait jingpang, ba ki briew ki shah sumar ha Maw kyrwat, Ranikor bad sha kiwei de ki bynta jong katei ka thain.

Ka donkam ka jing shisha bad ka jing iada ia ka koit ka khiah ki nongshong shnong, namar ba ka jingpei um jong ka jaka bret jaboh ha Nongbah Jynrin, ka lah ban long tang shi dana jong ka jingma, kaba ngim pat iatip bha satia.