Leh tyngeh ka Mizoram

Ka Mizoram ka la leh tyngeh shisha, halor ka jing ia dei bad u pud u sam bad ka Assam bad kawei ka long ba kam shym la kynriah ia ki pulit jongka, na ka jaka ia kajia bad kaba ar lane kaba kongsan eh, ka long u myntri kam poh iing jong katei ka jylla, u ieng halor ka nongrim jong ka Bengal Eastern Frontier Regulation (BEFR) jong u snem 1873 bad katei ka dei ha ka por ba ka sorkar phareng, ka phiah ia u pud u sam jong ki jylla jong ka thain shatei lam mihngi, ba kynthup ia ka Assam.

Ka jing shisha, ka long ba ka jylla shatei lam mihngi, kam shym la iasoh satia bad ka Assam, ha ka por ba ka India, ka ioh laitluid, hynrei ka dei ka Assam, kaba dei ka bynta jong ka India ba laitluid bad ka dei halor katei ka mat, ba ka sorkar India, ka dang ithuh ia ka jing dawa jong ka Nagaland, halor ka jing dawa jing laitluid jongka (wat la ka dei ka jingdawa kaba eh than), namar ba ki Khasi States, ki Naga, ki Mizo lem bad kiwei ki jaitbynriew, ki la mynjur ban iasnoh bad ka India, ha ka synshar khadar, lane kaba ki ong instrument of accession bad kam dei satia ka instrument of merger.

Ha kaba iadei bad ka Ri Khasi Jaintia, ka sorkar Assam hi dalade, ka la pynioh ia ka Khasi District Council bad sha Garo, ia ka Garo District Council bad kitei ruh, ki don la u jong u pud u sam bad kitei ki ieng sakhi, kum ki jingshisha haduh ha kine ki sngi, kiba ka Assam lane ki ar tylli ki District Council, kim lah satia ban khein dewthala haduh ha kine ki sngi.

U pud u sam hapdeng ki jylla jong ka thain shatei lam mihngi, ym dei ban iakren hapdeng ka Assam bad ka Meghalaya, lane hapdeng ka Assam bad ka Nagaland lane bad ka Mizoram, namar ka Assam, kam shym la pynkha ia kitei ki jylla, hynrei ka dei ka sorkar India bad kine ki jylla kiba mar pud bad ka Assam, ki dei ban ieng halor ka BEFR 1873, lane ka instrument of accession 1947, namar ka sakhi, ka kren shynna, halor ka jing iadei jong ka Nagaland bad ka sorkar India bad kat bym pat poi sha katei ka jing ia beit, ka dei ka bynta jong ki District Council lem bad ki trai jaka, ba kin ieng ban iada ia la ka jaka ka puta bad khlem da ailad, ban thombor da ki poiwir suda bad haba ka don pat ka jing ia kynad lane ka jing ia pyni bor, ka dei ka kamram jong ka sorkar Jylla, ba kan phah ia ki pulit pahara jongka, ba kin teh lakam ia ka suk ka sain bad tang katta ka la biang pura.

Hynrei ka jing iakren kam pud bad ka Assam, ka dei tang ka kam pyn lutpor, namar ba ka Assam, kam don ia ki dulir long trai ia ki jaka puta bad wat ka sorkar India, ka hap ban phai sha ki dulir jong u snem 1947.