Nongpoh: Ki nongialam ka HYC ha Ri Bhoi, myn hynnin ka sngi ki la leit ban kynduh ia ka Kong RM Kurbah, Deputy Commissioner ka Ri Bhoi, na ka bynta ban pynpaw ia ka jingpyrshah kaba jur halor ka jingthmu da ki katto katne ki kynhun kaba la tip kum ka ‘Ultra Socialites’ bad ka ban sa long ha ka 11 tarik mynta u bnai ha ‘La Nicolas Da Kine Resort’ kaba don ha shnong Umbir.
Ha ka kyrwoh kaba la phah sha ka Deputy Commissioner, ia kaba la soi da u Bah John Nongrum, President ka HYC bad u Bah Hercules Suting, General Secretary ka HYC, la pynpaw ba ka nongrim kaba la pynlong ia ka seng ban pyrshah ia katei ka Pool Party, ka dei hadien ba ka seng ka la iohi lyngba ki Video Clip Appeal, ba katei ka kynhun ka la khot la wer ia ki samla kynthei shynrang.
Hynrei kaba kham pynshon jingmut eh ia ka seng bad kaba la pynlong syndon ban pyrshah, ka dei hadien ba ka la lap ba katei ka kynhun, ka la buh ruh da ka jingkyrpad ia ki samla kynthei shynrang ba ki dei ban wanrah khnang tang ia ki patlun poh kynthei bad ki jingsop shadem kynthei (Bikini’s) sha katei ka Tamasa.
Kum ka seng hi kam sngewiahap ba kum kitei ki jait Tamasa ba ki don hapoh jong ka thain, namar ia kiba kum kitei ki jait Tamasa la shu bud tynneng na kaei kaba la ju leh ha ki Ri Sepngi, hynrei ha Ri Khasi hi kam iahap namar kin sa nangmih ki jingsniew bad suki suki kin sa ktah ia ki longiing kongsem bad ha ka imlang sahlang hi baroh kawei.
Namarkata haba iadei bad katei ka Tamasa, na ka liang ka HYC Ri Bhoi District, ka pynpaw ia ka jingpyrshah kaba jur bad kam lah ban pdiang da lei lei ruh, namar ka seng hi ka khein ba ki dei kiba pyrshah ia ka imlang sahlang. Kumta ka seng ka kyrpad naduh ia ki bor Distrik, bor Pulit bad bor shnong ba kim dei ban aijingbit ia kaba kum katei ka jait tamasa kaba ktah ia ka imlang sahlang, pynkut katei ka kyrwoh.
Phi don ban ong eiei?