Shillong 11 Lber:
U Myntri Rang bah ka jylla u Mukul Sangma u la ong ba ka jingshah kynnoh jongu ha ki snem ba la dep kum uwei na ki chairman jong baroh ki seng lehnoh ha ka jylla Meghalaya, ka la pynkhlem rain ia ka jylla, ym tang ia u.
Haba jubab mynta ka sngi ia ka jingiatainia halor ka jingkren jong u Lat ka jylla, u Myntri Rangbah u la ong, ha kane ka jingshah kynnoh ka la pynsaphriang shaduh kylleng ki jaka kynthup sha ri Europe ruh.
“Haba nga la shah kynnoh kum u chairman jong baroh ki seng lehnoh ha ka jylla, la pynsniew dur ia ka jylla Meghalaya baroh bad ym tang ia nga shimet. Nga la bthah ia kawei ka News Portal ba ka dei ban weng noh ia kane ka jingthoh kaba la saphred kylleng ka pyrthei haduh ba ki briew ki la tip lut. Ngam banse ban leit shaduh ka iing Kashari halor kane ka jingkynnoh”, la ong u Mukul Sangma.
Katkum ka jingkren jong u Myntri Rangbah kane ka dei ka jingthaw dur kaba sniew bha ia ka jylla bad ia u briew shimet kaba ktah, namar ha jaka ban ai jingmut ban tei ia ka kaba bha, la pyntieng ia ki briew ban wan sha kane ka jylla.
U Myntri Rangbah uba la kren kumba 3 kynta duna ha ka jingjubab hapoh ka iing dorbar hynne ka sngi, u la ong ba ka sorkar kan nym aili da lei lei ruh ia ki kam pyntriem ban ioh jaka ha ka jylla bad ka la shim bun ki lad ki lynti ban pynjem toin ia ki kam bymman.
U la ong ba ia ka kam lehnoh ha kane ka jylla bad ka thain shatei lammihngi ka India, la ioh lad ban pynkharoi namar ka jingioh suk ia ki tiar ialeh kum ka AK-47, bad kiwei. “Ha India tang T.2 lak la ioh ia ka suloi AK-47. Lymda iatreilang ki jylla ka thain mihngi baroh, kan long kaba eh ban pynduh jait ia ka jingmih ki seng lehnoh namar ba ki tiar ialehkai ki wan lyngba ki khappud bar ri”, la ong u Mukul da kaba kyntait ban khot iakren ia ki seng lehnoh lada kim sangeh shwa ia ki kam pyntriem jongki.
“Ngim lah ban khot iakren ia ki senglehnoh ha kane ka jylla khlem ki kyndon bad kata ka long, ba ki dei ban sangeh shwa ia ki kam pyntriem bad sa wan iakren”, la ong u Mukul.
“Ngim lah ban pynlong ‘hero’ ia ki dkhot seng lehnoh da kaba khot iakren khlem kano kano ka jingbuh kyndon kiba donkti ban pynkhih thma ia ka ri bad ban leh ia ki kam bymman ba shyrkhei, ioh kan ialam bakla pynban hadien habud”, u la ong.
U la ong ba kumba la shem, lada kawei ka seng ka wan iakren, ka mih sa kawei pat bad u la ong ba u Sohan D Shira u dei uwei uba la wan pyndem ha ka por ba u don bad ka ANVC hynrei hadien u la long uwei u runar ba shyrkhei ban leit phai biang sha khlaw ban ialeh pyrshah ia ka sorkar.
U la ong ba ka sorkar kam don satia kano kano ka jingleh shiliang ia kano kano ka kynhun kiengatiar la ka dei na Garo Hills ne na Khasi Hills. “Balei ka sorkar pdeng ka la iai bteng ban niew beain ai ka HNLC, ka daw ba kongsan ka long ba ka dang iai bteng ban khot pakhang shnong, ban pynmih ia ka jingpyrshah ri hynrei, kan nym don jingeh ia ka sorkar ba kan pynlait noh na ka jingniew beain lada kim leh ia kum kine”, la ong u Myntri Rangbah. U la ong ruh ba ia ki ksiang ban iasyllok bad ki seng lehnoh, ym dei bat hung ka sorkar jylla hynrei ka dei ka sorkar pdeng kaba thung ia ki bad ka jingkynnoh ba ka sorkar kam leh eiei, kam dei satia. “Ngi la dep thoh sha ka sorkar India ban thung ia ki ksiang hynrei, ka la ai jubab ba ki seng lehnoh ki dei ban sangeh shwa ia ki kam pyrshah ri bad kin sa leh ia kaba donkam”, u la ong.
U la ong ba ha kine ki sngi, ki kam pyntriem ki la kham stait namar ka jingleh tyngeh ki pulit bad ka jingbyrngem ka GNLA ban pynbthei bom lada ym sangeh ban kynra ia ki, ka pyni ba ki la iakynduh jingeh.
Phi don ban ong eiei?