Shillong, 16 Nailar:
Ka Hynniewtrep People Federation (HPF) Jaintia Hills District, hadien ba ka la ioh ki jingujor na kiba bun ki paidbah halor ka jingshim por ka ophis District Transports Officer (DTO) West Jaintia Hills District ban pyndep kat kum ka por ia ki kot ki sla jong ki paidbah, katei ka seng ka la leit ia kynduh ia u DTO ka WJH u bah Pyndap Laloo, ha kane ka 12 tarik mynta u bnai ban wad bniah na katei ka ophis ia ki daw jong ki jingeh jong ki padibah.
Ki nongialam ka seng kiba kynthup ia u President bah W. Chyr mang bad u General Secretary bah T.Rynthathiang ka seng ha ka jing iakynduh bad u DTO ka WJH ha ophis trei kam jong u, u bah Laloo u la kubur ba don ka jingthut bad jingpynslem na ka bynta ban pyndep ia ki kam ki jam jong ki paidbah ha ka por kaba biang, ka dei na ka daw jong ka jingthut ki tiar ki tar bad kumjuh ka dei ka jingduna jong ki kor treikam kum ki computer bad kiwei de, ka jingduna jong kine ki tiar ka dei ba na ka liang ki bor ba dei peit ia kane ka tnat ki pynslem ban pynpoi ia kitei ki tiar ha kane ka ophis, haduh mynta kane ka ophis kam pat lah ban ioh ki tiar kitar kiba biang ha ka jingiadei ban pyndep kloi ia ka kam ki paidbah lyngba kane ka ophis.
Kumta na ka liang ki nongialam katei ka seng ki la kyntu jur ia ki bor ba halor jong ka tnat DTO ban pynbiang noh mardor ia ki tiar ki tar treikam ha kane ka ophis DTO ha Jowai, khnang ba ki paidbah kin suk, kumjuh ban lait na ka jinglut por bad lut bai kali ban wan lai sien saw sien ia ka juh ka kam ha kane ka ophis, ong ka kyrwoh na ka seng lyngba u bah T.Rynthathiang General Secretary HPF.
Phi don ban ong eiei?