Jowai, 14 Iaiong:
Ki shipai BSF kiba iada ia u pud u sam ka ri India ha ki thain Khappud India-Bangladesh ha kane ka sngi ba-ar ki la ialam ia kumba 30 ngut ki rangbah ban leit jngoh kai ia ka thain Balat
khamtam eh ia ka Border Hat kaba don ha katei ka jaka.
Kitei ki 30 ngut ki kynthup ia ki u Dolloi Satpator, Dolloi Darang, u
Sordar ka raid Lyngkhat nalor kiwei kiwei kiba kynthup ia ki Rangbah shnong bad Secretary Shnong kiba dei na ka thain khappud India bad Bangladesh kiba shong ba sah ha East bad West Jaintia Hills.
Haba kren sha ki lad pathai khubor, u DIG ka BSF u SK Singh u la ong ba ka jingthmu ban wan ialam ia kine ki nongialam shnong sha Balat ka nong namar ba hadien ba wan shimti u IG ba thymmai jong ka BSF hangne ha Nongbah Shillong u kwah ba ki briew kiba shnong ha ki thain border ba kin ia ithuh ithaw ban ialong kawei da kaba ialam kai ia ki briew kiba shong ba sah ha ki thain border na kawei ka bynta jong ka border sha kawei pat.
“Ngi la wan ialam ia kine ki rangbah sha kane ka jaka namar ngi kwah ia ki ban iohi bad ban tip ia kane ka thain sha kane ka bynta jong ka jylla. Hangne ngi don ka Border Hat, ngi kwah ban kin iohi kumno kane ka Border Hat ka treikam hangne namar mynta ka sngi kadei ka sngi long iew ha kane ka Hat”, la ong utei u heh ki BSF.
Ki Shipai BSF ki la pynbiang haduh 3 tylli ki Mini Bus 2 tylli ia ki paidbah, kawei ia ki nongthoh khubor bad la ialam kai ruh ia ki shi lynter ka jingker sainar shiah ha katei ka jaka.
“Ka jingthmu jong ngi ka long ba kine ki briew kin ioh ban ia kren ia phylliew jingmut para ba iasah ha ki thain khappud ban tip ia ki jingeh bad kiwei kiwei ki jinglong jingman ha kane ka thain, Ngim dei ba ngi wan hangne ban iakren shaphang ka jingker sainar shiah ne shaphang kiwei kiwei ki kam kiba iadei ban ka jingker sainar shiah”, la bynrap utei u heh ka BSF.
Ki riew paidbah ha katei ka thain khamtam kito kiba wan die ia ki mar ki matta jong ki, na baroh arliang – Bangladesh bad India ki la wan ban ujor pyrshah ia ki shipai jong ki, ki BSF bad ki shipai Bangladesh halor ka jingbym shym la iohlad ka jong ki ban wanrah kylluid ia ki mar ki matta ban die ha katei ka iew.
“Ki BSF kim shym la shah ia ki ban wanrah ia ki mar lait noh tang ki katto katne ki jait mar”, la ong ki Khasi jong ngi kumjuh ki nong Bangladesh ruh kiba la wan tur sha ki nongthoh khubor ki la iathuh ba ki Shipai jong ka Bangladesh ruh ki leh kumjuh.
Halor kane na ka liang u DIG ka BSF u la pynshai da kaba ong, “Ngi ngim donbor ban khang ia ki mar ki matta ban wan khaii ha kane ka iew, hynrei ngi hap ban bud ia ki kyndon jong ka sorkar India bad sorkar Bangladesh namar ia ki jait mar kiba lah ban die ha kane ka iew ki dei tang kito kiba la mynjur da ki ar tylli ki ri”.
U la bynrap ruh ba ngi kum ki BSF kiba don ha ki khappud ngi hap ban bud ryntih ia ki kyndon ka sorkar India.
Phi don ban ong eiei?