Jowai: Ka Khasi Jaintia Students Union (KSU) Narpuh Unit mynta ka sngi ka la pynlong ia ka awarness Program halor ka jingdih drugs bad kumjuh ruh ka la sam khusnam ruh sha ki samla ba la pass bha ha ki examination bapher bapher jong ka thain.
Ia kane ka jingialap ban pynsngewthuh shaphang jingpynsniew u Drok bad ruh ka jingsam khusnam la pynlong ha ka hall jong ka Holy Cross Higher Secondary School, Umkiang ha kaba la wan ban ia shim bynta ruh da u President ka KSU, NEHU Unit kum u special guest, u samla Pynkmenlang Sanmiet, u Shiningstar Kharbihkhiew uba dei u President ka Mawryngkneng Unit bad u Central Execcutive Mmber, u samla Ruben Najiar uba dei peit ruh ia ka JHDU nalor u Secretary, Cherity Suja bad Financial Secretary, Streamly Niangti jong ka Jaintia Hills District Unit.
Haba kren shaphang ka jingsniew u drok u Dr. B Sumer uba dei peit ia ka Umkiang PHC u la ong ba u drok udei u jingsniew uba pyntroin ym tang ia ka met jong u nongdih hynrei ka pyntroin ruh ia ka iing ka sem jong u. Kito ki samla ba ju myllien ban dih drok kim banse ban kylla ki nongtuh nonglute lada kim don pisa ban thied ia u drok.
“Phi dei ban ong em ia u drok te ynnai”, la kyntu u Doctor ia ki khynnah skul 11 bad 12 jong katei ka skul.
Na ka liang u samla Streamly Niangti u la ong ba buh bah ki drok ki la iaid lyngba ka East Jaintia Hills District bad ki jingshisha ki la paw lyngba ki lad pathai khubor bad lada u drok u iaid lynti na ka District jong ngi khlem un don kynrei hapoh kane ka District.
“Phi dei ban kiar na kum une u jingdih basniew uba pynjah burom ymtang ia ka shimet lyngba ki kam bad ki jingpang jong u, hynrei ka pynjot ia ka iing ka sem bad ka imlang ka sahlang”, la ong u bah Streamly Niangti.
U samla Sanmiet, haba kren kum u nongshah khot sngewbha ba kyrpang, u la ong ia ki samla ba u drok udei uba ka pyrthei ka pyrshah haduh katta katta bad dalei lei ruh ki samla baieid jong ngi kiba dei ka lawei ka ri bad ka jaitbynriew kim dei satia ban ngat kum ha une u mard ba kynsha bad ba pyniap shyrkhei ia ki million ngut ki samla shynrang bad kynthei.
Ha kaba iadei ba ka khusnam, u la ong ba kane kadei u soh ka jingtrei shitom jong phi bad bad kam dei ban kut tang hangne hynrei phin dang iaibteng ban iai trei shitom namar tang uba trei shitom uba lah ban ioh ia u soh u bathiang.
U samla Pynkmenlang Sanmiet u la pynkut da kaba ong, “Kane ka juk kam dei shuh k juk rah wait rah stieh ne suloi hynrei ka juk jong ka jingnang jingstad bad u khulom udei ka waitlam nep arliang syrti ban wanrah ia ka jingjop ia kano kano ka thma ha ka jingim jong phi”.
La ioh ruh ka jingkren na u samla Kharbihkhiew bad na u bah Ruben Najiar bad ia ka jingialang la pyniaid da u President jong ka Narpuh Circle u samla Kwilness Suchiang.
Ha kane ka sngi, ka KSU ka la sam ia ki khusnam kaba kynthup ia ki Syrnod bad Pisa sha ki 12 ngut ki samla ka thain kiba la wan ha ka kyrdang kaba nyngkong (1st Division) ha ki Examination bapher bapher jong ki.
Kitei ki 12 ngut kidei kiba la pass na ki skul bapher bapher naduh Jowai, Shillong bad kynthup ruh ia ki ba na ka Holy Cross Higher Secondary School Umkiang.
Phi don ban ong eiei?