Shillong, 15 Lber:
Kumba 300 ngut kynthup naduh ki nong ialam bad ki dkhot jong ka seng Congress, UDP bad NPP na ri Lum Garo kiba la leit ban pyniasoh ialade mynta ka sngi sha ka seng BJP. La pdiang burom ia ki ha ka jingialang bah kaba la long mynta ka sngi ha Williamnagar, East Garo Hills. Uwei na ki nongialam ba ha khmat uba la leit ban ia soh bad ka BJP u dei u Santosh Marak u nongialam ka UDP uba la rem ruh ha ka elekshon MLA 2013 na Williamnagar ha ka Deborah Marak ka seng Congress.
Ha katei ka jing ialang bah la don lut ki nongialam ka BJP na kane ka jylla kynthup naduh u President Rangbah u Ma Shibun Lyngdoh, President Mahila Morcha ka kong Bianca Kyndiah, President Yuva Morcha u Egenstar Kurkalang,u President ka West Garo Hills district u Bernard Marak, General Secretary ka Kisan Morcha Rocky R. Marak,General Secretary ka BJP u bah David Kharsati bad kiwei pat.
U Ma Shibun haba kren ha katei ka jingialang u la ong ba katei ka jingwan ia soh BJP ki nongialam bad ki dkhot jong kiwei pat ki seng saiñpyrthei kan dei ruh ka sngi sah kynmaw ha ri Lum Garo naba ka pyni ba ki paidbah ki la ngiah ia kiwei pat ki seng saiñpyrthei khamtam ka seng Congress hynrei ki la phai khmat mynta sha ka seng BJP.
U Santosh Marak uba dei ruh u Secretary ka UDP ha East Garo Hills u la ong ba ka rai ban leit ia soh BJP ka dei ka rai ba u la shim ryngkat bad ki paidbah katei ka District,u la ong ba ka seng UDP ka dei ka seng ka bym poi shano shano ruh bad ia kane u la ong ba la iohi ha ka elekshon GHADC kaba dang shu dep long ha u snem ba la dep. “Ym don lynti shuh ia ka UDP naba kam poi shano shano ruh, ka seng Congress pat ka dei ka seng kaba shyrkhei bha ha ka kam bamsap” ong u Santosh haba kren sha ki lad khubor.
U bah David Kharsati haba kren ha katei ka sngi u la ong ba baroh shi katta ki paidbah ki la phai khmat sha ka Congress, NPP bad UDP hynrei mynta ki la sngewthuh bad dei na kane ka daw ba ki la wan noh sha ka BJP. U la kynthoh ruh ia ka jingkynnoh ka seng Congress ba ka BJP ka dei ka seng kaba isih ia ki riewlum bad ki Kristan bad ka ba khang ban bam doh masi, “Baroh ngi ia tip ba ka sorkar pdeng kam ju khang doh masi bad kam lah ban leh kumta namarba ka dei ka kamram jong ka jylla,kane ka dei tang ka jingkynnoh jong kito ki bym don ishu ban kynthoh ia ka seng BJP, hynrei dei pynban ka BJP kaba ai jingkyrshan ia ki riewlum, mano ba ai mynsiem bad kyrshan ia u Prof.G.G Swell bad u Purno A Sangma ban ia khun ia ka shuki President, hato ym dei ka BJP, hato ka BJP ka pyrshah riewlum” ong u bah David Kharsati.
U bah David u la ong ruh ba ka sorkar BJP ka thaw lad kumno ban pynkhlaiñ ia ki District Council kynthup ka Meghalaya bad ka thaiñ shatei Lam mihngi katba ka sorkar UPA pat ka la thaw da ka komiti kaba ialam da u Veerapa Moily ban pynduh pyndam ia ki District Council.
Phi don ban ong eiei?