Shillong,11 Rymphang: Ha ka por 1:40 mynsngi ka kali u Dr.Mukul Sangma (uba donlang hapoh) ka la jan aksiden mynta ka sngi ha 3 mer Upper, Shillong bad katei ka jingjia ka la jia ha ka lad ban hiar sha Umlyngka kaba dei ruh ka jaka ba ki kali kamai ki ju pynhiar bad pynkiew nongleit nongwan. Ki nongniah kali kiba la sakhi da la ki jong ki khmat ki la iathuh ba ka kali u myntri rangbah ka la suh wiaw na ka liang ba wan na Shillong ban kiew sha Upper Shillong.
Hynrei haba la poi ha katei ka jaka katba kawei ka sumo Maxx kaba ym shym la iohi bha ia u nombar kali hynrei la shu iohi ba ka dei ML-04 A3374, dang pynhiar ia ki briew kiba shong shapoh; kynsan kynsan kawei ka Scooter ka la mih na sha kyndong bad ha katei ka jingjia ka Maxx ka la kynriah ban lait na katei ka Scooter, hynrei ka Bumper jong ka pat ka la ia tyngkhuh bad ka kali u Dr.Mukul.
Tang mar ia dei kumta la ong ba ki pulit jaiñiong jong u Dr.Mukul ki la hiar na kali bad ki la mai la tim la tla ia utei u nongniah Maxx bad bad ha katei ka por ruh ka Scooter ka la phet hi wut bad kham hadien la ong ba ki bor pulit ki la rah noh ia katei ka Maxx sha thanad ba ym shym la ioh jingtip aiu kaba jia ia katei ka Maxx (kali kamai). La iathuh ba ha ka por ba ki pulit jaiñiong u Dr.Mukul ki la hiar na kali baroh ki nongleit nongwan ki la tieng lut bad ma ki ruh ki la hiar lut napoh kali bad wat u pulit pyniaid kali ruh uba don ha Laimer la ong u la kulmar khlieh ha katei ka por namar ba ki wan mih ki kali bad diang bad mon.
Ki nongniah kali kiba la sakhi ia katei ka jingjia ki la ong ba katei ka dei ka kam ba u myntri rangbah u dei ban ithuh ba la donkam kyrkieh shisha ban pynheh noh ia katei ka surok kaba don ha Lai mer namar ba kam dei tang ka sien ba nyngkong kaba ju jia kumtei hynrei ka dei kaba la jia na ka por sha ka por bad kane ka dei ka sngi ba ia ka tyngkhuh syndon bad u khlieh duh ka jylla.
Katkumka khubor pulit la ong ba katei ka kali ka dei kaba la niah da u Jeskalur L Mawdoh, 25 snem karta bad ka la tynrah ia ka kali u myntri rangbah kaba don ia u nombar ML-01-0001 (ka kali Accord Honda), ki pulit ki la ong ba ki dang tohkit ia katei ka jingjia.
Phi don ban ong eiei?