Shillong, 12 Nailar:
Ki runar ba shyr-khei kynthup na ki dkhot ki seng lehnoh GNLA bad ULFA ki la jan lait phet sa tang khyndiat kynta na jaka set ia ki ha Shillong District Jail kaba don ha Jail Road, Shillong.
Lymda dei ba ki pulit ki la ioh jingtip ha ka por kaba biang, kine ki runar ki la lait phet na katei ka jaka set kaba jur bha ka jingpahara.
U nongthoh khubor uba la iakren bad u SP (crimes) ka East Khasi Hills u Bah Vivek Syiem u la iathuh ba baroh kiba donkti ha kane kam, ki don 18 ngut, kynthup ki dkhot ka GNLA, HNLC, ULFA, bad kiwei pat ki runar ba la leh ia ki kam shyrkhei.
“Mynta ka sngi, ngi la ioh jingtip ba ka la don eiei ha katei ka phatok ha ka por 1 baje eiei mynsngi bad mar mar bad u magistrate, ngi la leit pynlong ia ka jingjurip kynsan sha katei ka jaka bad la lap shisha ia ki tiar ba kine ki runar kila dep shna bha ban shu lait phet suk beit”, la ong u Bah Vivek.
U la ong ba kine ki runar ki la shna ksai da ki jain siang thiah da kaba ot bad tar bha bad jyllain pyllun, haba ki la teh ruh ia ki ha u dieng bad u nar rod ba ioh na jaka ap ki nongpahara kaba rim kaba don ha katei ka jaka.
Katkum ka jingiathuh u Bah Syiem, kine ki runar ki la dep plan ia kane ka kam la katto katne por, ha kaba ka don ka jaka kaba ki la shna sop sop ia ki tyllai bad khlong ia ki nar nod na katei ka jaka.
“Lymda ngi la ioh ia ka jingtip kaba biang por, khlem pep, kitei ki runar ki la ioh lait phet syndon ban rakhe sngi laitluid”, la kren danda u SP (Crimes).
Ka Shillong District Jail ka la ju mad teng ia ka jinglait phet ki koidi ha u snem 2009 ha ka por jong u Fullmoon Dhar, nangta ha ka por ba shah set u Secretary ka HNLC u Bah Cheristerfied Thangkhiew ha u snem 1993, kiba la lait phet na kane ka phatok.
Katkum ka jingong u Bah Vivek ka jingioh lad ki koidi ban lat phet ban leh ia ki kam hapoh phatok, ka dei namar ba duna ka jingphikir (checking) ba khah khah ha kane ka jaka set phatok.
“Kine ki runar ki buh ia kine ki tiar sha jaka ba bun sanium bha kaba don ha ka bynta ba jur jingpahara, kiba shna ia u tyllai ba jrong haduh kumba 16.5 phut na ka jain siang thiah”, la bynrap u Bah Syiem.
U la ong ba ki pulit ki la lap ruh ar tylli ki nar rod bad ki dieng ba shna jingkieng ba la buhrieh bha ha kawei ka jaka ap pahara barim.
Na jaka sum ruh ka mala ba nyngkong, ki pulit kila ioh tam bun bah ki jain kombor ba la tar ksai ban shna tyllai ba la leh da kine ki briew. “Baroh ki tiar ki tar ba la ioh kurup la kurup noh ki pulit bad ki majistror”, la ong u Bah Syiem bad bynrap ba ki pulit ki la rejister kam ia kane ka jingjia bad ka jingtohkit kan iaid ban pynngat ia ki bad ban wad ia kiba ialam khmat ia kane ka kam.
Phi don ban ong eiei?