Shillong, 12 Nailur:
U Myntri Rangbah ka jylla u Dr Mukul Sangma u la ong ba ka jingthung kam kontrak ha ki tnad sorkar bapher bapher ha kane ka jylla ka la sdang naduh u snem 1979 bad kane ka long katkum ka rekod ba la don ha ka sorkar.
Haba jubab ia ka jingkylli, ba la wanrah da u MLA ka Nongkrem u Bah Ardent M Basaiawmoit mynta ka sngi hapoh ka iing dorbar thawain halor kane ka phang, u Dr Mukul u la ong ba ki don ar bynta ki rukom thung kam kontrak ka sorkar, kawei ka dei na ka bynta ki kam ba lait haba ym pat don briew bad kawei pat ka dei na ka bynta ban pyntreikam ia ki skhim sorkar kiba ju don naka por khamtam na ki skhim ka sorkar pdeng.
“Ia kane ka jingleh la sdang ha kane ka jylla naduh u snem 1979 haduh kine ki sngi”, la ong u Dr Mukul.
Ia kiba shu thung kontrak yn thung bujli da ki briew kiba la pas na ki District Selection Committee ne MPSC.
Hynrei ha kajuh ka por, u la kubur ba ka jingthung kam kontrak ka la pynduh lad ia kiba dei hok khamtam haba ki DSC ne MPSC ka la pynmih ia ki result haba kam don ki kam ba lait ne haba kiba pas ki kham bun ia
ki kam ba lait.
“Ngi la iakynduh kum kane ka jingeh ha kaba ki kandidet kiba pas na ki DSC/MPSC kim ioh kam namar bym don ki kam ba lait. Kane ka dei kaba bakla bad dei na kane ka daw, ba ka sorkar ka la pynmih ia ka hukum
kaba pyrkhing ba ki DSC ne MPSC ki dei ban pynlait ia ki kandidet ba pass katkum ki kam ba lait”, la ong u Dr Mukul.
U la ong ba kito ki nongtrei sorkar kiba shu thung da ka kontrak lada pynkylla nongtrei pura, hap ban iaid katkum ki kyndon ba la pruid ka riti synshar bad ka rai ka Kashari Supreme Court.
Phi don ban ong eiei?