Shillong, 11 Rymphang: Ka shuki jong u Dr.Mukul Sangma ka la khih te ka la khih shisha mynta ka kynti, ong ki MLA Congress haba ia kren bad une u nongthohkhubor.Katkum ka jingiathuh jong ki ki la ong ba mynta lei lei ka khliehduh jong ka seng Congress ka Sonia Gandhi ka la pan na u Dr. Mukul ia ki kyrteng ki MLA kiba don bad u ban pyni ba u don ia ka jingbun paid.
Haduh ba thoh ia kane ka khubor u la nongthohkhubor u lah ioh jingtip ba ki don 12 ngut ki MLA kiba la rai kut ba kin don beit bad u Dr.Mukul Sangma. Kiwei pat ki MLA kiba ju don ha syndah u Dr.Mukul Sangma ki la iathuh ba kumba long mynta ka met jong ki ka don bad u Dr.Mukul, hynrei ka mynsiem jong ki kam don shuh bad u bad ki shu ap ia ka por kaba biang tam ban ai ia ka rai ba khadduh jong ki halor kane.
Ka jingeh ba ki MLA ka seng Congress ki ia kynduh mynta la ong ba ka dei ka jingbym ioh jong ki ia u nongialam uba baroh ki sngewhun la iathuh ba ki don katto katne ngut ki MLA kiba kwah ban long nongialam hynrei mynta ka kynti ki la raikut beit ba ia ka kam nongialam la ka long kumno kumno ruh kin rai kut beit ha u bah D.D Lapang bad ki la ong ba katei ka jingrai kut jong ki ka dei ruh ka jingailad ba khadduh ia u bah Lapang namar ba kumba long mynta u la noh shisha ka rta jong u.
La wad jingtip kumba katno ngut ki MLA kiba don ha ka liang u Dr.Mukul bad kumba katno ngut kiba pyrshah ia u bad katno ngut kiba don hapdeng, u nongthohkhubor u la ioh jingtip ba ki don kumba san ngut ki MLA kiba la rai kut ban ia don beit ha syndah u Dr.Mukul bad kita ki kynthup ia ka kong Ampareen Lyngdoh, u bah AL Hek, Zenith Sangma, Dikanchi Shira bad sa uwei pat u MLA na ka ri Khasi Jaintia hi bad kitei ki la long kiba thikna ban iap ne im kin iai don beit bad u Dr.Mukul.
Nalor kitei la ong ba ki don kumba 6 ngut pat ki MLA ki bym pat lah ban rai hano kin ai ia ka rai ba khadduh jong ki hynrei katkum ka jingtip la ong ba kitei ki shim ia lade kum ki Independent bad shano ba bun paid shata kin noh. Ki lad khubor ki la iathuh ruh ba ki don pat ki MLA Congress mynta kiba ap shuki bad kim sngewpher lada jia ba dang wan u Dr.Mukul ne kin wan kiwei pat hynrei ki dei ban pynthikna pat ba ki dei ban ioh shuki bad uwei napdeng kita la ong ba u dei u bah Ronnie V Lyngdoh u MLA ka Mylliem Konstitwensi.
Don pat ki MLA Congress kiba la ai jubab sha ki nongthohkhubor ba ka jingkhih ka sorkar Congress ka khih tang sha kata ka jaka kaba don jingkhih lane kaba ki ong ha ka ktien nongwei ka Epicentre bad kitei ki bym don ha kata ka Epicentre ki la ong ba kam don jingkhih, hynrei kiwei pat ki MLA ki la ong ba lada ka don ka jingkhih kam ju ktah ia ka Epicentre ka ktah sha kiwei pat kiba don marjan bad ka Epicentre.
Phi don ban ong eiei?