Saindurlang Iawim
Haba ngi shu peit ia ka Seng BJP ha Meghalaya ka dang long kumba sara
ia u symbai soh halor u mawsiang bad shuh shuh lah ban ong ha hangne ha State jong ngi ka dang long zero.
Ki nongmihkhmat paidbah la ki (MLA/MP/MDC) namar kine ki sitting MLA (2) ar ngut kata u Bah AL Hek na Pynthor Umkhrah Constituency bad u Bah Sanbor Shullai na Shillong South Constituency ki dei ki rangbah ba la shondur lypa ia ki paidbah ha la ki dohnud, ngim lah ban ong ba na Pynthor Umkhrah bad Shillong South Constituency ka jop ka BJP hynrei ngi hap ban ong na Pynthor jop i Bah AL Hek bad na Shillong South pat i Bah Sanbor Shullai. Namar ka iapher lada ngi ianujor tang na Assam ruh ha katei ka State lada ngi ong ba jop ka BJP ka don ka nongrim 100% ba ha katei ka State. Tangba ka dei ka Symbol u Lotus la u dkoh ne kyllut, phi tang shu kylli haei phin thep vote, ka jubab kan long beit ha u Modi ne BJP. Namar ba ki sngewthuh shai ba ka BJP ka don u nongialam ba tbit bad ki ri ka pyrthei ki burom ia u, bad uta u dei u Narendra Modi ba mih na ka jylla Gujarat.
Mynta ngin iawad balei ka jia kumne ha ine i jylla barit eh jong ngi bad ba dang sahdien ha kiba bun ki liang, lada ngi phai ha kaba iadei bad:-
- Ki surok ruh ngim pat ioh ki surok kiba bha kum ha ka nongbah Shillong bad ki markhap jong ka, ynnai iakren ia ki surok sha ki thain nongkyndong lei lei wat hadien 48 snem ba la ioh ia ka jylla ba pura hynrei ka dang bha ka surok ba iaid lynti u David Scott kaba la don markhap bad ka shnong rit ka Nongthymmai Kyndiar kaba don sharum Pynursla la i synei ia ki bapli ki nongkyndong ki hap iaid ka khohruh khohram bad dang don ki shnong haduh mynta kim pat ithuh kaei kata ka surok.
- Ka lynti rel um pat don connection kaba la buh jingeh shibun ia ki paidbah namar lada ki marbam ne ki mar rep da ka rel bad ki kali ka dor ka la iapher bak-lybak bad ka kham pynlehrain ha khmat ka pyrthei ba ki briew na ka jylla Meghalaya kim pat nang ban leit jingleit da ka rel ki hap ialam da ki guides ban rung hapoh rel.
- Ka airport ne kad liengsuin dang don malu mala ha kaba la pynlong ia ki tourist ne nongleit jingleit ban duh jingshaniah ban wan jngohkai ia kine ki mar ba la ai sngewbha u Blei kum ki lum ki them, ki kshaid, ki riat ki ram, bad ki jinglong kyrpang jong ka mariang ha kane ka ri jong ngi.
- Ki University ne skul bah ha ki lain bapher bapher ngim pat don ki khun samla ba don sap ha la ka bynta ki hap leit pule shabar ki jylla.
- Ka rep ka riang ruh ym pat don ki jingplie lynti ban hikai da ki juk stad science wat tang ban ring um sha ki bri ki bsah nga lah iohi ha kine ki thain riwar ki ba pli ki nongrep ki hap ban pun da u diengkwai ne da ki shken kiba hap repair man la u snem.
- Ki karkhana ruh ym pat don bun ki tiar pynmih na kane ka jylla ki shu sepei ne hap die la ka die khlem tip dor ha kiba bun hi ki liang ym lah ban pyni lut hangne namar kane ka bynta beit beit ka iasoh bad ka dei ka Political Issue.
Kumta lada ngim nang ban jied ia ki Political Party kane ka jingpang jong ka jingsahdien kan dang ban khrew. Ha kaba iadei bad kane ka bynta kan kdew ia ki jingshisha katkum ka jingpynshong nia balei ki paidbah ki dang artatien ban jied ia ka BJP ka daw ka dei ba kam pat ju synshar pura ne ban bteng watla ka bat tengha ka por u Vajpayee hynrei tang shi term ym kum ha kane mynta ba hadien san snem ka dang bteng ia ka jingsynshar. Kumta ka bih ne ka jingialam bakla jong ka seng Congress bad ki paralok ka la ioh lad ban rung ha ka thwei pyrkhat bad iohlad ban longdoh longsnam ha ki paidbah jong kane ka jylla. Kumta kan dang shimpor ba kin sngewthuh khamtam ia kito ba la kylla Khristan namar ki shim ba ka BJP kaba isih bad niewbein ia ki Khristan, Muslim bad thombor ia ki rit paid, ba ka khang bam doh masi kumta ter ter. Ym don por ban batai lut tangba kine ki thawnia dei ki riewsain pyrthei jong ka seng Congress.
Hynrei ha kane ka jingialam u Modi ia ka sorkar NDA ki paidbah ki la iohi da la ki khmat lajong ba haduh katno kane ka sorkar BJP ka la theh ia ka song iarap pisa sha kane ka thain North East. Ka la pynmih ia ki tnat treikam kaba la tip ka Donor bad ka Look East Policy ban pynjanai shuh-shuh ia ka jingtreikam ka sorkar. Ha kaba ki District Council ha ka por ba synshar ka Congress kum ju ioh ei ei na ka sorkar, hynrei mynta pat ha ka synshar BJP pat ka long kumba hap u phria ha madan haduh ba ki MDC ki la jan iaryngkat bor bad ki MLA ha ki lad pynroi. Kumta ki paidbah ki dei ban bishar bha bad ia nujor hi dalade kano ka seng kaba kham iajan ym ban shu long mawsawa ne tuta moina shu pyrthuh bud. Bad ngan shu pynkynmaw ba ka BJP wat ia ka shuki ba hehduh ha ka ri ka la kloi ban pynieng kyrtong President ia u Proff. G.G. Swell bad ia u Purno A. Sangma kiba dei ki Khristan bad ki rit paid.
Mynta lyngba ka kyntien SAB KE SATTH SAB KE VIKAS u Modi, ngin shem ba ka jingioh jingiarap ki paidbah salonsar khlem da peit shiliang shisien ba la don ha ka thup BPL baroh ki ioh ka jingiarap bad ym don shuh wat tang iwei ruh ban klet.
Hynrei suki suki kine ki jingialam bakla ka Congress yn sait khuid na ka thwei jingpyrkhat jong ki paidbah. Balei nga ong kumne namar haba nga bishar ia ka result jong ka Election MLA u snem 2018 lah ban sakhi ka jingioh vote ka BJP ka kiew ha man la ki constituency kumne harum:
Sl. Constituency Votes Kyrdan
No.
1 East Shillong 4294 2
2 Jirang 4152 4
3 Khliehriat 12104 2
4 Mairang 2390 5
5 Mawsynram 4098 5
6 Mokaiaw 5751 3
7 Nartiang 2168 3
8 Nongthymmai 3065 3
9 North Shillong 5166 2
10 Pynthor Umkhrah 10166 1
11 Raliang 8879 2
12 Shella 3390 4
13 Shillong South 112011 1
14 Sutnga Shangpung 7423 3
15 Ampati 8617 2
16 Bajengdoba 3435 2
17 Dalu 3302 3
18 Mahendraganj 6133 2
19 Phulbari 4570 4
20 Role Sangri 2679 4
21 Salmenpera 4140 3
22 Sal Sela 2367 4
23 Songsak 3077 3
24 South Tura 4896 2
25 Tikri Kila 3615 4
Hangne ngi la sakhi ba la jan mar shiteng na ki 60 tylli ki seat ha Assembly ka BJP ka la kiew bha khlem pep ha ka General Election 2023 kan sa ioh ban ialam ia ka sorkar ha Meghalaya khamtam lei lei ka jinglah u Modi ban leh bha haduh katne ia ka thain North East jong ngi. Kaba kongsan eh mynta lei lei u la pyniasoh lut ia ki nongkyndong da ka scheme PMJSY haduh katno ka long ka jingkyrkhu ia baroh ki nongkyndong namar baroh shi katta ki iaid ki surok khohruh khohram hynrei mynta ki ioh ia ka surok kaba standard ka la iabeh bad ki surok ha ki nongbah bapher bapher ka Ri India. Ngam lah ban niew tang lut ia ki kam babha ba la pyndep da ka sorkar BJP ia ka state jong ngi. Hangne nga buh ia ka jingkyntu ia ki paidbah ba kin da bishar bad thew tarajur bha. Nga khot ruh ia ki paralok Khristan ba kum ki Khristan ym dei shuh ban shu ngeit biej ne ban dang artatien ia ka BJP to khie noh naba thiah, bta la ki khmat, peit lem de ba ha kiwei kiwei ki jylla ha Ri India kiba don bun ki Khristan hynrei ka sorkar pat ki la synrap lang ba ka BJP ha kajuh ka por ki nongkitkam bad ki MLA ki dei ki Khristan ngam lah ban da kdew ba ha ka Election MP 2019 ki kynhun Muslim ki mih shakhmat ha ryngkat ka lama ba don u Tiew Lotus ki bah ha tyrpeng bad ki ia pyrta Sab Ke Satth Sab Ke Vikas Vote for BJP, Modi Zindabaat ki kynthoh ba dei ka Congress kaba ialam bakla ia ki paid Muslim tang ban ioh Phoido Politics. Kumta hadien ba la declare ia ka result ka Congress ka poi tang ha ki 2 dak (Digit).
Ngam lah ruh khlem da ai burom ia u nongialam ka UDP bad u MLA barim jong ka Shella Constituency u Dr. Donkupar Roy (ba la khlad noh) uba long shisur bad u la bat hi triang ia ka soskular ka jingiatehlok bad ka BJP ha Guwahati ban iathaw sorkar lang watla u la shah pynbiej ha ka Congress da kiba bun rukom bad wat na ki nongialam ka UDP ruh don kiba pyrshah ban iathaw sorkar ryngkat bad ka BJP. Hynrei une u rangbah na ka bynta ka roi ka par jong ka State u ieng beit triang bad ka BJP namar ba kum u nongialam ba rangbah u la ngiah ban peit ia ka jingsahdien ka jylla Meghalaya kumba la kdew sha khmat bad u da kyrmen skhem ba ka sorkar u Modi kan kham phai khmat namar ba ki ia don lang hapoh ka NEIDA ba uba iohi lypa ia ka jingtreikam u Modi ha ki 5 snem ba la dep kum u PM bad kum u CM ka Gujarat 25 snem.
Kumta une u rangbah u la shim beit ia ka rai na ka bynta ka roi ka par ka jylla, kumta hadien ba u la khlad noh ki paidbah jong ka Shella Constituency da ka mynsiem ba sngew don main ki la pynphong ia ka sopti u kpa ha u khun rangbah jong u u Bah Balajied Synrem uba dei u samla rangbah uba baroh ki ong u dang khynnah palat hynrei ha nga pat nga ong kumne ba ha rta te u dang rit hynrei ha ka ain pat u la dei lypa u kpa ka ain. Ngam kwah shuh ban nang pynjrong ia la ka jingthoh namar ba ki kham stad hi kiba pule nga te nga shu pynkynmaw, shuwa ban pynkutnoh nga kyrmen skhem ba ki paidbah kin long kiba stad bad iohi jngai ia ka lawei jong ki pateng ban dang wan.
Ha ka Election jong u snem 2023 to ngin ia pynthymmai noh ia ka sorkar bad ngin ai majority ia ka BJP ha ka Assembly na bynta ka JINGKYLLA namar kumba ka long mynta ka sorkar u Modi ka dang ioh burom hakhmat ki paidbah ka Ri India wat ha khmat ka pyrthei hi. Kumta ha u snem 2024 ruh khlem pep u Modi yn dang bam smai kum u Prime Minister ba thymmai jong ka ri.
To long kiba stad, shemphang bad iohi jngai ym ban shu shah kit KHOH TYMPAN.
Phi don ban ong eiei?