Shillong: U Conrad K Sangma, myntri rangbah ka Jylla, u kren pyn thikna mynta ka sngi, ba ka sorkar MDA, ka dang ieng ha kajuh ka nongrim, ba ka pyrshah ia ka ain jong ka Citizenship Amendment Bill (CAB), lada jia ba kam don kano kano ka jing kylla, na ka bynta ban iada ia u paidlang ka Jylla.
“Ngi lah kren shai ia katei ka mat, naduh ka sngi nyngkong bad ngin iai pyrshah lada ka don kano kano kaba long pyrshah ia ki briew jongngi. Ka jingbit jingbiang jong ki nongshong shnong jongngi, ka dei kaba kongsan duh” ong U Sangma, haba kren sha ki kotkhubor mynta ka sngi.
Ka la don ka jing kynnoh ba U Sangma, ula nang pynjem shibun ia ka nongrim jongu, halor ka CAB, hynrei halor katei, ula ong “Kham mynshwa ngim shym la iohi ia kaei kata ka ain bad ngi sah ha ka umdum bad ngim don lynti, lait noh, na kaba pyrshah ia ka. Mynta ngi iohi, ba ka sorkar India, ka shim da kawei pat ka lynti bad ka don ka jingiakren kaba nang iaid shakhmat” ong u myntri rangbah.
La ong shuh da U Sangma, ba kin don shibun ki kynhun, ki ban ia kynduh ia u myntri kam poh iing lem bad ki nongtrei jong ka tnat kam poh iing ka sorkar India bad kumta ka sorkar Jylla, kan sa shim ia ka rai ka jongka, lyngba kitei ki jingiakren, ki ban nang iaid shakhmat.
Halor ka jingiakren jongu bad U Amit Shah, u Sangma, u ong ba ula iakren ia U Amit Shah, ba un wan sha ka Jylla bad sha kiwei de ki bynta ka thain shatei lam mihngi, ha kaba u ong “Nga la pynsngew ia ka jingdonkam ban iakren halor ka ain CAB, ha kaba U Amit Shah, ula mynjur ia katei ka mat jong ka jingiakren” ong U Sangma.
Phi don ban ong eiei?