Jowai, 12 Rymphang: Ka wah Myntdu kaba ker tawiar ia ka nongbah Jowai ka lah banrah ka jingeh ia ki paidbah jong kane ka nongbah kiba shaniah ban ioh um sorkar na ka namar ia kane ka wah la leh dusmon ia ka da ki har rukom.
Na ka bynta ban ia kane ka wah na ki jingpynjakhlia ba bun rukom, ban pynneh pynsah ia ka jingitynnad jong ka bad ruh na ka bynta ba ki briew kin nym ioh pang shitom bad ruh ban im ki dohum dohwah ka bor District ka la buh syndon da ka jingmana kaba tyngeh.
Ka bor District West Jaintia Hills lyngba u District Magistrate, u la pynjari da ka section 144 CrPC na ka bynta ban iada ia katei ka wah.
Katkum katei ka hukum kaba la pynbna da u District Magistrate, u la hukum ia baroh ki trai par dewiong, ki trai dewiong kiba lum thup ban kin sumar bha ba ki um jakhlia kiba mih na ki par dewiong jong ki lane na ki jaka lumthup ia u dewiong kim dei satia ban poi sha wah Myntdu. Ki don ban don ka jingkitkhlieh ban khang lad ia ka um jakhlia lane ka um Dewiong ban kan tuid sha katei ka wah.
Ka wah Myntdu kaba mih na Mih Myntdu bad tuid tawiar ia ka nongbah Jowai arsut shaduh Bangladesh. Ki bynta ba sharum jong kane ka wah naduh Sahksaw (hajan ka shnong Chamcham terter shaduh Borghat bad Kharkhana ka la iap lypa la bun snem mynta namar ka um dewiong.
Hynrei ka bynta ba shaneng naduh ka jaka ba ka mih haduh Pynthor Ialong ha ka jingshisha ka dang lait na ka jingjakhlia na ka um deiwong hynrei namar ba ka rukom pynjakhlia ia kane ka wah na bynta ba shaneng naduh jingkieng Pamblah (Shillong-Jowai road), Tre-iongriang (Jowai-Dawki bridge) ter ter sha[bteng sla 7] duh jaka dam um ka PHE ka la pynjakhlia ia kane ka wah da ka jingsait kali ha ki bynta ka tre-iongriang, Riat-turiem bad kumjuh ka jingbret ia ki jakhlia kiba har rukom naduh ka jingpyntuid ia ki painkhana sha ki nala bad sha ki liar.
Katei ka hukum ka la khang pyrshah ia kito kiba sait kali hapoh wah bad ia kito kiba don jaka sait kali ba kim dei ban pyntuid ia ki um jakhlia bad ki um lati umphniang sha wah Myntdu. Kidei ban tih da ka thliew ban pjiar ia ka um jakhlia kiba mih na ki jaka sait kali ki riew shimet, ki karkhana kiba don ha jan katei ka wah.
Kane ka jingmana pyrshah hapoh katei ka kyndon 144 CrPC ka long hadien ba u Deputy Commissioner ka WJH, u Arun Kumar Kembhavi u la ioh ka jingujor ba katei ka wah Myntdu ka la kylla rong sky blue (rong suinbneng).
Lada don kino kino kiba pynkhien ia kane ka ain, kin ngat ha ka jingpynsaja katkum ka kyndon 188 IPC nalor kiwei kiwei ki ain kiba katkum ka The Water (Prevention and Control of Pollution) Act 1974, The Environment (Protection) Act 1986 nalor kiwei kiwei ki kyndon ain.
Phi don ban ong eiei?