KHADC – Musikal Shuki
Joannes JTL Lamare,
Kynton-U-Mon, Nongkrem
Kumba ka don ka jingong, “Uta uba kwah rhah un ngat ruh ha ka Lanot”. Kane te la dei shisha kata kaba la jia na ka por sha ka por haba ngi peit hangne ha Ri jong ngi. La i lehrain ban peit ban ban sngap ba man la ka sngi ki mih ki khubor ba la sdang ka Drama ha KHADC. Shisien peit bad sngap la ngiah hi SHOIÑ bad la dap haduh ryndang.
Man ka por ka KHADC ka long beit ka jaka leh Tamasa ne ka jaka kaba pawnam tam ha kylleng ka pyrthei ban iaknieh shuki. Ha ka 5 snem ka samoi ka KHADC, la kumno kumno yn ioh beit 4-5-6 ngut ki CEM. Kaba thamula shuh shuh ka long ba don kiba long CEM tang da ki sngi bad don ruh tang da ki taiew bad don ruh da ki bnai.
Shuh shuh ka jing ia kyntiap liang kaba i thamula bha bad la long kum ba kynthih kper ka Blang. Imat da ki shong ha kajuh ka liang 5 snem kim lang thik kumba shah kynthah ha u Thyllah. Ka jingiaknieh shuki ban long CEM lane EM lane Chairman lane Dy Chairman ka lah long ka raibi jong ka KHADC bad haba ym ioh ia kaba ki kwah, ki sdang sa ban ia kynthoh iwei ia iwei kumba ju mlien ki tngaw ha khlaw.
Ngam lah sngewthuh shuh ba balei haduh katne ka wan jia. Ym don shuh ka jingia sngewthuh jingmut para MDC. Kane ka paw shai kdar ba kine ki nongmihkhmat ki jong ngi kim don satia ia kata ka bor pyrkhat kaba skhem ban pyrkhat ia ki paidbah.
Ngi ki paidbah haba ngi jied ia ki nongmihkhmat ngi kwah ba kin long ki nongthawain kiba paka ym kiba RHAH shuki. Shibun ki issu kiba dang dei ban pynbha na ka bynta ki Ritpaid kum ma ngi. Hynrei long pynban da khongpong. Lada kane ka iai jia shi jia, la sngewdei ban ai jingsneng ia kine da kaba tyngeh khnang ba kin ym ioh shuh ban ieng elekshon. Ban leh ia kane la dei ban iaid da ka aiñ. Namarba kumba ka long mynta ka KHADC kam don ia ka Anti-Defection Law lane ka Aiñ ban khang ia ka jing kyntiap seng bad namarkata ka daw sa mih ki Nongmihkhmat laitlan kiba kwah ban ryngkoh na uwei u lum sha uwei pat khlem tip kaei kaba don hapdeng kita ki lum.
Ka KHADC lada ka dang iai don shi don ki Laitlan ki paidbah ki la dei ban dawa noh ia ka “SYSTEM of RECALL” lane ka “kyndon ban weng noh ia ki jingling Nongmihkhmat kiba la shah jied kiba ym iaid katkum ka kyndon aiñ”. Lada ngin lah ban pynurlong ia kane, nga tharai ban kin ym don ki Nongmihkhmat kiban nud ban iaid lait na ka mon u paidbah uba la pynjop ia ki Nongmihkhmat.
Kumba ka long mynta, ka KHADC ka long ha ka umdum namarba bun ki kam kiba ka dei ban pyntyllun ki la shu sahkut lut tang namar ba ialehkai “MUSIKAL SHUKI ki khyllung khynnah (KIDS MUSICAL CHAIR)” ki MDC. Lada kane ka iai ja shano ka jaitbynriew jong ngi kan poi. Khlem pep kan poi sha ka LIEWLONG KHLEM TRAI (Bottomless pit).
Ko MDC lane kino kino ki nongmihkhmat paidbah badonburom, katba phi dang long Nongmihkhmat, “wat ju lehkai ia ka Jingsngew ki paidbah kiba jied ia phi, ioh ka pynpoi pynban sha ka lanot khop. (Don’t underestimate the Power of the Common Man, lest Greater Evils befall)”. Pyni ia ka jinglong Rangbah ha ka kam ka jam, ha ka rukom trei bad pyniaid kam bad wat long tang ki Rangbah ha ka Por Iaknieh shuki.
Lada phi don tang kawei ka jingkitkhlieh bad kata ka long ban leh bha, khlem pep phin long ki Riewkhraw watla khlem ka Shuki ruh. Dei hangne kein ba ki paidbah kin burom (Respect) ia phi shikatdei. Wat long ki Sohpyut jong ka jaitbynriew. Phi dei ban “TEI ia ka Jaitbynriew, ym ban TREI kylla ia ka”. Ka shuki ka lah ban neh 2-3-4-5 snem hynrei ka burom ka neh junom.
Phi don ban ong eiei?