Shillong, 8 Naitung:
U Executive Member ka KHADC ba peit ia ka tnad Mining and Geology u Bah Donkupar Su mer u la ong ba kam shym la don kano kano ka jing pyndonkam bakla ia ka pisa ba la mang na ka bynta ban shna ia ka surok Wahkaji-Mawthabah ba la bei da ka UCIL.
“Ym don daw ban sngew aratien ia ka jing pyntreikam ia kane ka surok. Ka UCIL ka la pynlait ia ka pisa hadien ba la pynlong ia ka jingjurip ia ka surok”, la ong u Bah Sumer haba iakren bad ki nongthoh khubor hynne ka sngi Hatmajai.
Shwa ia kane, u general secretary ka Kylleng-Pyndeng Sohiong Uranium Land Owners’ Association, u Bha Heas diengland Lyngdoh Sang riang u la kynnoh ba ka jingpynslem ban pyndep ia ka surok ha ka por kaba biang ka lah ban dei namar ka jingbamsap.
“Ka kynhun ba kyn thup ia u AMD Senior Engineer (Civil), Surveyor AMD, Chief Superintendent (Civil), Additional Superintendent (Geo), DGM (UCIL) bad u Project Engineer ka KHADC ki la jurip ia katei ka surok Wahkaji-Mawthabah kaba jrong 20 km ha ka 30 tarik Iaiong bad ha ka 1 tarik Jymmang 2014. Ki la pyn long ia ka jingjurip ia ka jingiaid ki kam”, la ong u Bah Sumer. U la ong ba ka jingmang pisa ia katei ka surok ka long T. 19.88 klur hynrei hadien ba la lap ia ka jingleh Technical Audit, ba ym lah ban pyndep ha ka por kaba biang, namar ba dang don bun ki kam ba dang sah wat hadien ba la pynlait ia ka pisa kaba T/ 18.57 klur.
“Halor kane, ka UCIL ka la bthah ia u Engineer ban pynkhreh ia ka jingkhein kaba thymmai kaba la poi sha kaT. 20.31 klur. Namarkata, ka jinglut baroh na ka bynta kane ka surok ka la kot sha ka T.38.88 klur”, la ong u EM.
U la ong ba ka surok Wahkaji-Mawthabah yn pyndep ha u Nohprah mynta u snem. “Na ki 13 km, tang 6.5 km la pyndep”, la ong u Bah Sumer.
U la ong ba ka EC ka la thaw ia ka komiti ban leit jurip ia katei ka surok bad shen kan leit ha kine ki sngi ban wan.
“Haduh mynta, T. 31.29 klur la siew sha u kontraktor” u la ong u Bah Sumer bad kaba sah yn sa siew hadien ba la pyndep ia ka jingtrei.
Phi don ban ong eiei?