Ki paidbah kim dei ban khuslai, ka jylla kam duna ka umphniang, ong u myntri

Shillong:U Myntri ka tnat Food, Civil Supply bad Consumer Affairs ka Jylla Bah Comingone Ymbon, ula pyntip ba ka Sorkar ka la khot da ka jingïalang bad ka North East Petroleum Mazdoor Union (NEPMU) ha Circuit House Nongpoh ha ka 29 tarik mynta u bnai.

Haba pyntip ïa kane, u Bah Coming ula ïathuh ba ïa ka jingïalang bad ka NEPMU yn khlieh da u Secretary ka Civil Supply bad Consumer Affairs u Pravin Bakshi ha ka jingdonlang hi heh ka tnat Pulit bad ki bor district.
Lah ban kdew ba ka NEPMU ka la byrngem ban ym kit umphniang IOCL, BPCL bad HPCL sha Meghalaya halor ka jingkynnoh ba ki Pulit ki la pyndik bad thombor ïa ki nongñiah bad nongbud trok kit umphniang da kaba shah kem bad kiwei kiwei tang namar ka jingsuba ba ki trei bym hok.

“Ban wanrah biang ïa ka jingïasngewthuh jingmut, ka Sorkar Jylla kan shong jingïalang bad ka NEPMU ha Nongpoh ha ka sngi Balang ha ka por 12 baje ban pynbeit ïa ki jingkynnoh baroh bad ban pynthikna ba ka jingwan rah umphniang kali kam dei ban sangeh ha Meghalaya,” la ong u Bah Coming.

U Bah Coming ula ïathuh ba haduh mynta ka Jylla kam duna ïa ka jingdon umphniang bad ula bynrap ba ki paidbah kim dei ban khuslai namar ka Sorkar ka shim khia halor ka jingbyrngem ka NEPMU.
Ula ïathuh ba ka Sorkar ka la ïakren bad baroh ki Deputy Commissioners (DC) jong ki District ban pynthikna ba ka jingpoi ki kali kit umphniang kan ïaid beit ïaid ryntih khlem kano kano ka jingshah pynthut.