Shillong, 16 Nailar:
Ka Jaintia Hills Truck Owners Association ka la kynnoh ba ka ophis ka Dorbar ki Daloi Ri Jaintia ka la khrong pisa jubor na ki trok ha Mookyndur khlem da ka nongrim kaba biang. Halor katei ka jingeh ki nongialam katei ka seng ki la ong ba ki la leit ban ia kynduh ia u CEM ka JHADC bad ha katei ka jingiakynduh u la kular ban shimkhia bad u la pynpaw ruh ba ki Daloi kim pat donbor ban leh kumtei namar ba ka Council ka dang hap ban shna ia ki kyndon aiñ katkum ka hukum jong ka Supreme Court. Katei ka seng ka la pynpaw ka jingpyrshah kaba jur ia ka ophis ki Daloi namar ba kim iaid katkum ki kyndon ka JHADc bad ki khlem pyntip sha katei ka seng.
Ha kawei pat ka liang, katei ka seng ka la ia kynduh ia u Commissioner Transport u bah I.W. Ingty ban pynpaw ia ka jingeh jong ki namar ka jingiaid lynti ki trok 14 shaka sheneng ha ri Jaintia bad u Commissioner u la hokum ia ki kompeni dewbilat ba kim dei shuh ban pyndonkam ia kitei ki jait trok namarba ka surok ha ri Lum Jaintia kam pat iahap. Mynta ka sngi pat ka tei ka seng trok ka la leit ban ia kynduh ia ka seng ki kharkhana pynmih dewbiat (Jaintia Hills Cement Manufacturing Association) ha kaba ki la pyntikna ba nangne shakhmat kim pyndon kam shuh ia kum kitei ki jait Trok bad lada ka seng ka dang lap ia kine ki jait trok ba ki pyndon kam ka seng kam banse ban leh ia kaba don kam kat kum ka ain. Ka la ia kren ruh bad ki karkhana dewbilat halor ka dor bai kit bai bah ha kaba ka la don ka jingiapynbeit ban ia imlang. Katei ka seng ka la pyntip ba kan khot ia ka jingialang paidbah ha ka 20 tarik mynta u bnai ha Phra Mer ha ophis jong ka ha ing u Ma S.Kyndait ha ka por 10:30 baje mynstep ban ia kren ia ka jingeh ki trok.
Phi don ban ong eiei?