Nongpoh, 12 Rymphang:
Hadien ba la mih ki jingpyrshah kaba jur na ki nongialam shnong jong ki Lai Shnong bad kumjuh na ka paidbah na kitei ki shnong, halor ka jingthmu jong ka sorkar ban ai jaka ia ki ha Nongsder, ka FKJGP Umiam Circle, ka la ia ka jingkyrshan ia kitei ki nongialam shnong bad paidbah, da kaba pynpaw ia kajuh ka jingpyrshah jur halor ka jingthmu ban ai jaka ia ki shipai ha Nongsder.
Ki shipai jong ka Umroi Cantonment, hadien ba ki dep ban ai ia ka jaka na ka bynta ban pynheh ia ka Umroi Airport, kumta ki la pan kylliang na ka sorkar ban bujli da jaka ia katei ka jaka kaba ki lah dep ban ai sha ka sorkar ban pynheh ia ka Umroi Airport, hynrei kane ka jingthmu jongki ban shim ia katei ka jaka la pyrshah jur da ki paidbah nongshong kiba hapoh lai tylli ki shnong ha Nongsder.
Ha kaba iadei bad kane, na ka liang u President ka FKJGP Umiam Circle, U Bah L. Kurbah, u la ong baka seng pyrshah jur halor kane ka jingthmu jong ka sorkar ban ai jaka sha ki shipai, kumba la mih ki jingpyrshah da ki nongshong shnong bad ka seng ka shim ruh ia ka rai ban pyrshah kadei halor ka nongrim ba ki paidbah ki la wan ujor sha ka seng ban ai ia ka jingkyrshan na ka bynta ban pyrshah halor katei ka jingthmu ai jaka sha ki shipai.
“Hadien ba ngi la iohi ia shibun ki jingeh ba ki paidbah ki ju mad ha namla ka por ha ki kam leh hangamei da ki shipai, kumta ngim kwah shuh ban dang iohi biang ba ki paradoh parasnam kin dang iai mad ia ki kam thombor jong ki shipai kumba la ju mad da ki paidbah ha ki por kiba la leit noh” ong u Bah Kurbah.
Kane ka jingpyrshah jong ki paidbah ka long shisha kaba shongnia bad kaba don la ka nongrim, namar ki paidbah ha kane ka thain ki la dep ban mad ia shibun ki jingleh donbor bad pynibor da ki shipai khlem da burom shuh ia ki trai jaka trai muluk ka dei hok ba ki paidbah kin pyrshah jur, la bynrap u Bah Kurbah.
Ban kyrshan tyngeh ia rai ki paidbah jong ki lai tylli ki shnong, ka seng FKJGP ka dawa mardor na ka sorkar jylla, ba kadei ban sangeh noh halor ka jingthmu ban ai jaka bujli ia ki shipai ha Nongsder, lada ka sorkar ka leh mynthi, kum ka seng kam banse ban shim da kiwei pat ki lad jingiakhih ba tyngeh ban kyrshan ia ka rai jong ki paidbah ka thain Nongsder, pynkut u Bah Kurbah.
Phi don ban ong eiei?